Dissiplinêre stappe teen eks-PS uitgestel

Bewerings van korrupte praktyke

01 March 2018 | Ministeries
Henriette Lamprecht – Die ministerie van gesondheid en maatskaplike dienste is deur die arbeidshof verbied om met dissiplinêre stappe teen sy voormalige permanente sekretaris (PS) voort te gaan.

Dié bevel volg op ’n ooreenkoms tussen die onderskeie partye wat die minister, dr. Bernard Haufiku, insluit en hang af van ’n hersieningsaansoek wat tans voor die hof dien.

Dr. Andreas Mwoombola sê in hofstukke die dissiplinêre proses teen hom word op ’n “onwettige wyse uitgevoer met ’n dissiplinêre komitee wat onwettig saamgestel is”.

Mwoombola is in Julie verlede jaar met onmiddellike effek sonder ’n verhoor en vergoeding geskors. Hy is later uit dié pos na die kantoor van die eerste minister oorgeplaas.

Die klagtes teen hom sluit onder meer in korrupte praktyke in die aanwysing van tenders en “impulsiewe, onredelike en onwettige besluitnemingsprosesse in die administrasie en bestuur van openbare fondse in die ministerie”.

Volgens Mwoombola het sy dissiplinêre prosesse reeds “onbillike arbeidspraktyke” behels soos vervat in artikel 48(2) van die Arbeidswet 11 van 2007.

Volgens hom is dit duidelik dat dit alternatiewelik tot ’n onbillike arbeidspraktyk sou lei wanneer die dissiplinêre proses voltooi is.

Voorts is die billikheid van die reglement van orde van die dissiplinêre ondersoek volgens Mwoombola “reeds ernstig ondermyn”.

Ook voldoen die dissiplinêre komitee wat deur mnr. George Simataa (kabinetsekretaris) in konsultasie met Haufiku en die eerste minister, me. Saara Kuugongelwa-Amadhila, saamgestel is, nie aan die vereistes van die bogenoemde wet nie, sê hy.

Volgens Mwoombola is die voorsitter en lede van die komitee regeringsamptenare en sy juniors, wat hul “onafhanklikheid en onpartydigheid” ondermyn.

Mwoombola beweer voorts die aantygings teen hom is nooit ondersoek nie, ’n onderhoud deur die ondersoeker is nooit met hom gevoer nie en het hy ook nooit ’n verslag van ’n ondersoek teen hom ontvang nie.

Tydens sy dissiplinêre verhoor in September en ook Oktober verlede jaar, sê Mwoombola, was drie lede van die komitee sy juniors en was dokumente wat die klagtes teen hom moes regverdig, onvolledig.

Van die klagtes sluit in dat Mwoombola ’n oordrag onderteken het wat “gelykstaande aan bedrog” is.

Ook het hy na bewering “oneties” opgetree toe hy ’n maatskappy toegelaat het om die ministerie te nader vir die verskaffing van medisyne wat binnekort sou verval. Dit het glo daartoe gelei dat die ministerie “vrugtelose en verkwistende uitgawes” aangegaan het.

Soortgelyk

 

Geingob: Gelukkig Vrouedag, vroue

1 dag gelede | Regering

President Hage Geingob sê hy erken die dapper pogings van vroue om beter gemeenskappe te skep en tot die voorspoed van die mensdom by te...

Verkrygingsraad presteer

1 dag gelede | Regering

Die Sentrale Verkrygingsraad van Namibië (CPBN) se raadsvoorsitter, mnr. Patrick Swartz, en administratiewe hoof, me. Lischen Ramakhutla, het vanoggend lig gewerp op uitdagings wat die...

Namibië topbestemming by ITB

1 dag gelede | Toerisme

Namibië is gisteraand as beste safari en wildbestemming by die Internasionale Toerismeskou in Berlyn (ITB) in Duitsland aangewys.Die minister van die omgewing en toerisme, mnr....

Wet slaan toe op wapenlisensies

2 dae gelede | Ministeries

Denver Kisting – Op die oomblik hoef iemand wat om ’n wapenlisensie aansoek doen, nie bewys te lewer dat hulle in staat is om ’n...

Reënweer vertoef langer

2 dae gelede | In beeld

Die Namibiese weerkantoor voorspel sonnige en baie warm weer vir vandag in die verre weste en suidweste van die land, terwyl dit elders gedeeltelik bewolk...

Water: Verligting ná hemelhoë rekeninge

2 dae gelede | Regering

Elvira Hattingh - Windhoekers wat vandeesmaand uitsonderlike hoë waterrekeninge ontvang het, kan ‘n sug van verligting slaak omdat die droogtetarief vir huishoudings net tot Januarie...

Kalender 8 Maart

2 dae gelede | Kuns en vermaak

Nou aan die gang» Tapz is 'n meester van die bira en die Wes-Afrikaanse djembe. Dit kan op sy debuutalbum, Awaited Wait, wat in Desember...

Jeuggeweld ruk Outjo

2 dae gelede | Misdaad

Denver Kisting Drie jongelinge van Outjo is steeds agter tralies nadat hulle glo sowat 'n maand gelede twee ander jong mans binne 43 minute doodgesteek...

Minister gee Nida nuwe raad

2 dae gelede | Plaaslik

Ogone Tlhage – Die raad van die nuwe agentskap vir nywerheidsontwikkeling in Namibië (Nida) sal gereeld moet vergader om homself as semi-staatsinstelling te vestig. So...