Dis weer sulke tyd

Dis al weer winter - toeneus-, loopneus-, snotneus- en natneus-(soos 'n bees)tyd.

En al wat 'n winterkwaal is wat nie geïgnoreer kan word nie, moet behandel word!

Ek is só lief vir die koue seisoen en geniet dit as mens so toe bly. Alles moet toe wees, dis lekker snoesig!

Dit is die beste seisoen ooit. In die winter kan jy baie doen solank jy net nie op die koue fokus nie.

Ek dink dit is ook die beste tyd om wakker te wees.

Dit is nie soos in die somer wat jy niks gedoen kry omdat jy net warm kry en altyd moeg en lus vir niks is nie.

In die somer gee die hitte jou nie 'n kans om iets te doen nie, jinne, jy kan nie eers 'n lekker bord kos geniet nie, want dis warm en wie wil nou eet as dit baie warm is?

Ek wil my kos eet sodra dit ingeskep is, maar as dit warm is, moet ek wag tot dit koud is en dan verloor ek later ook my eetlus.

Miskien het mense net die verkeerde denkwyse oor die koue weer, maar dis die beste ooit!

Ek dink mens moet net weet hoe jy jou goedjies op die kookrooster moet uiteensit en die spyskaarte nie confuse nie.

Kinders moet ook mooi toegehou word - veral babas moet mooi opgepas word.

Ouers moet hul kindertjies teen die koue toehou en hulle knus onder die kooi hou - dis nou ás hulle gehoorsaam is.

Ek kyk mos as mense wat kamma “warmbloedig” is hul truie aantrek, dan moet jy weet dis al weer daai tyd van die jaar.

As mense eers begin truie aantrek, moet jy weet die seisoen is chilly, en jy moet die attire warm kry se kant toe roer!

Alles in die winter is vir my lieflik: Jy eet lekker vet gemsbok, drink lekker stomende warmsjokolade, lê en kuier lekker onder die dik kombers voor die TV en sit saans voor die verwarmer.

Wintertyd word daar ook minder gekuier.

Almal kry koud en jy hoor net verskonings van “die kind hoes en ek dink ons moet maar net binne wees”.

Die winter en die reënseisoen is die beste ooit. Jy kan lekker rondom 'n vuur kuier, maar die nadeel van 'n vuur is jy kry net jou voorkant warm en jou agterkant is yskoud, om nie te praat van die bont ossies (hittekolle) wat jou vel voor op jou bene maak nie.

Die lekkerste gedeelte van rondom die vuur kuier, is ook met 'n lekker potbroodjie, 'n soppie en 'n geel kruisement-teetjie - daai is nou niemand se besigheid nie!

'n Bosvarkie sal ook lekker rondom die vuur smaak, of is dit ontoelaatbaar?

Boonop raak die hele huis mos wintertyd 'n apteek. Die ergste van alles is die apteekreuk, daai aroma van die medisyne, maar dit remind 'n mens nog jy moet net dankbaar wees.

Winter is die beste seisoen van die jaar. Moet nou nie vir mekaar uit die huise uit sit nie, dis koud op straat - wag ten minste tot dit warm is en raak ontslae van mekaar, want dis weer kouetyd - byt net vas!

Los eers die mense, honde en katte dat hulle ten minste binne bly tot die winter verby is.