‘Dippenaar het ongeluk veroorsaak’

10 October 2018 | Howe
Erwin Leuschner op Swakopmund - Die gru-ongeluk op 29 Desember 2014 naby Hentiesbaai wat die lewe van ses mense geëis het, “is deur die bestuurder van die Toyota FJ Cruiser veroorsaak”.

Dít was gister die woorde van die Suid-Afrikaanse ongelukkenner en deskundige op die gebied van ongelukrekonstruksie, mnr. Johan Joubert, in die verhoor waarin mnr. Jandré Dippenaar op moord teregstaan.

Joubert het sy getuienis in die streekhof op Swakopmund gister afgesluit met die gevolgtrekking die “nalatige bestuursgedrag” van Dippenaar het tot die ongeluk gelei.

Dit is vervat in sy lywige ongelukverslag van meer as 100 bladsye waarin hy elke aspek van die gru-ongeluk in die fynste besonderhede ontleed het.

Joubert het nie net die fisieke getuienis ontleed nie, maar ook die getuienis van verskeie getuies ingesluit.

“Dit is duidelik die FJ Cruiser het teen ‘n hoë spoed gery en drie voertuie op ‘n blinde hoogte verbygesteek,” sê Joubert.

Hy het Maandag getuig hy het dié voertuig se spoed kort voor die ongeluk op daardie noodlottige dag op 147,6 km/h bereken, terwyl die maksimum toelaatbare spoed op die Swakopmund-Hentiesbaai-soutpad 100 km/h is.

Die spoed van die aankomende Ford Ranger waarteen hy gebots het, was volgens die ingeboude GPS in dié voertuig 85 km/h.

“Uit die bostaande is dit duidelik die oorsaak van die ongeluk was die roekelose bestuursgedrag van die bestuurder van die Toyota FJ Cruiser, mnr. Jandré Dippenaar. Sy roekelose verbysteek van drie voertuie op ‘n blinde hoogte het die bestuurder van die Ford Ranger genoodsaak om voorkomende stappe te doen en hy het aan die verkeerde kant van die pad beland (die regterkant van die pad vir voertuie wat in die rigting van Swakopmund ry),” skryf Joubert in sy verslag.

Hy gaan voort en sê: “Die roekelose bestuursdrag van mnr. Jandré Dippenaar het volgens die getuienis tot die dood van ses mense gelei, met die enigste oorlewendes van dié ongeluk mnr. Dippenaar en me. Antonia Joschko.”

Joubert het gister herhaal wat hy die vorige dag gesê het, naamlik dat die bestuurder van die Ford Ranger “geen ander keuse gehad het nie as om na regs te swenk in ‘n poging om ‘n botsing met die FJ Cruiser te vermy nie”.

Sy verslag is deur verskeie sketse aangevul van hoe die ongeluk plaasgevind het.

Dippenaar se regsverteenwoordiger, adv. Louis Botes, het gister vir ‘n elektroniese weergawe van die sketse gevra sodat die verdediging dit kan bestudeer.

“Die gedrukte weergawe (A3-grootte) is só klein dat ons met ‘n liniaal moet speel om ons berekeninge te maak. En dit kan nie akkuraat wees nie,” het Botes aangevoer.

Joubert het egter geweier om sy data beskikbaar te stel en het aangevoer die verdediging het hul eie deskundige aangestel en hy voel nie verplig om dit met hulle te deel nie.

Landdros Gaynor Poulton het gelas hy hoef dit nie elektronies beskikbaar te stel nie, maar versoek dat hy dit in ‘n groter formaat uitdruk.

Dít het gister en eergister tot verskeie verdagings gelei. Die verhoor duur vandag voort.

Soortgelyk

 

Honderde miljoene vir veevoer nodig

23 ure gelede | Landbou

Ronelle Rademeyer - Die 2019 droogte is ‘n omvangryke ramp en ten minste N$170 miljoen is nodig om net 5 persent van die nasionale veekudde...

Min of geen handboeke vir nuwe leerplan

23 ure gelede | Onderwys

Henriette Lamprecht – Óf drupsgewys óf glad nie. Dit is volgens verskeie skole oraloor die land die huidige stand van handboeke vir die nuwe leerplan...

Regional council must account for vandalised buildings

23 ure gelede | Infrastruktuur

AUSSENKEHR – The //Kharas Regional Council must account for government buildings that are vandalised and left to become white elephants, the minister of urban and...

Swapo beslis dorpsraadslede se lot

23 ure gelede | Politiek

Dorpsraadslede van Okahandja en Rundu moes Maandag ure lank by Swapo se hoofkantoor in Windhoek wag om te hoor wat hul lot is. Verskeie nasionale...

Groeiende stad druk rioolstelsel

23 ure gelede | Infrastruktuur

Elvira Hattingh - Die Windhoekse munisipaliteit erken sekere rioolpype in die stad moet opgradeer word om die groeiende getal stadsbewoners te akkommodeer. Terselfdertyd beloof hulle...

Weer vir 19 Februarie 2019

23 ure gelede | Weer

WEERWAAK: Bloedige hittetoestande word vir die res van die week in die binneland verwag.BINNELAND: Mooiweer en bloedig warm in die ||Kharasstreek. Elders sal dit gedeeltelik...

Gammams staan steeds stil

23 ure gelede | Regering

Elvira Hattingh – Windhoek se munisipaliteit (CoW) sê hul Gammams-watersuiweringsaanleg staan steeds stil nadat swaarbrandstofolie meer as twee weke gelede in die stad se rioolstelsel...

‘Vroue is sterk’

23 ure gelede | Maatskaplik

Mariselle Stofberg – TrueKrav Namibia het Donderdag, in samewerking met die Namibiese Vrouevereniging en Kosmos, ’n praatjie oor geslagsgeweld in die hoofstad aangebied.TrueKrav bied...

Namcor wil vry van sekere wette wees

23 ure gelede | Energie

Elvira Hattingh - Namibië se Nasionale Petroleumkorporasie (Namcor) het ‘n aansoek by die Namibiese Kompetisie-kommissie ingedien om vir die volgende 10 jaar vrygestel te wees...