Die smuljare van lugrederye

21 February 2018 | Rubrieke
Ek weet nie of daar enige waarheid daarin steek nie, maar ek kan stories onthou oor oorle' Basterkaptein Hans Diergaardt wat glo 'n bokkop as padkos op 'n vlug na Geneva in die vroeë 1980's ingepak het.

Die geleentheid was 'n Verenigde Nasies-indaba oor die toekoms van Namibië. Die gewigtheid van die politiek van die tyd het my verbygegaan. Wat vasgesteek het, was die bokkop op die vlug.

As kinders het ons laf gewonder of die oom die bokkop in 'n Tupperware-bak of toegedraai in tinfoelie saamgedra het. Kon hy darem die sappige bokwange op die vlug laat opwarm, of moes hy dit koud neem?

Wat was sy medepassasiers se reaksie toe hy – sekerlik – die kake moes oopbreek om by die vetterige tong uit te kom? Wat het hy met die kopgebeendere gemaak? Terug in die bak of tinfoelie en toe in die aktetas gepak om later van ontslae te raak? Wat sou die oorsese ­doeanemense sê sou hy met gebeendere daar land?

Vlieg daai tyd was nog grênd en raar - veral as jy só ver moes vlieg. Vir ons was dit amper asof jy 'n formele pak klere moes dra om betaamlik op 'n vliegtuig te kon klim. Amper soos ons in die ou dae mooi moes aantrek as ons “dorp” toe gegaan het.

Vir oompie Hans, soos hy genoem was, se onthalwe was ons daarom baie bekommerd oor die betaamlikheid van 'n bokkop op die vliegtuig! Die enigste troos waaraan ons kon dink, was dat die meerderheid van die passasiers op daardie vlug seker ander landsgenote sou wees wat die bokkop-spesialiteit sou kon verstaan het.

Maar oompie Hans het sekerlik smaaklik sy eie tuisgebak geniet terwyl hy die vreemde wêreld ingevlieg het.

So terloops, ek dink nou sommer ook aan 'n vriend wat sy agtstuk KFC-pakkie móés kry vir ons vlug eers na Johannesburg op pad na Swaziland 'n klompie jare gelede.

Dié het hy vinnig verslind die oomblik toe die liggies in die kajuit aangaan ná die opstyg en toe daarna, maag trommeldik geëet, die dun SAL-kombersie oor sy gesig gegooi en aan die snork geraak. Baie sjarmant!

Die punt is, almal soek trooskos as jy op reis gaan. As jy vlieg, of dit nou vir werk of plesier is, is daai uurtjies in die lug tóg 'n tydjie van “afsluit”, 'n blaaskansie, en mens voel dan om 'n bietjie gepamperlang te word.

Ek weet nie hoe die lugrederykos in oompie Hans se tyd was nie, maar ek is seker dit was nie soos deesdae se chicken or beef-variëteit in die goedkoop klas nie.

Maar het julle al ooit gehoor van die absolute bederf op Skandinawiese vlugte in die 1950's tot die 1980's?

'n Standaardaanbod was 'n gourmet buffettafel swaar gedek met van kreef tot kaviaar, 'n hele skaapboud waarvan jou uitsoeksnitte met flair voor jou gesny is, gebraaide hoender met kraakvel, 'n verskeidenheid worse, allerlei slaaie met geurige slaaisouse opgedis uit 'n doelgemaakte bak en nie 'n plastiekpakkie nie, allerlei gebak, en natuurlik, smaaklike nagereg wat weggespoel kan word met 'n warm – of rêrig warm – drankie.

'n Finale luuksheid was die paletreiniger. Vingerleklekkergoed!

Oor die jare heen het die kospakkies op die vlugte – insluitend in Skandinawië – kleiner en smaak­loser geword.

Met die alewige mantra van “ons moet spaarsaming met dít of dát wees”, klink die outydse bederf – insluitend oom Hans se bokkop op die vlug - amper anderwêrelds, nie net asof dit uit 'n ander era kom nie, maar asof dit van 'n ander planeet af kom!

Hoe gemaak om die geil jare van destyds te laat herleef? Miskien moes ons nie ons oorvloed mors in die jare van oorvloed nie. Dan kan ons almal in die toekoms kreef en kaviaar, of miskien sommer 'n lekker bokkop ook, aan boord geniet!

Soortgelyk

 

Tsumeb-Otavi railway line upgraded to SADC standard

1 dag gelede | Infrastruktuur

TSUMEB - The upgrading of the railway line between Tsumeb and Otavi to the Southern African Development Community (SADC) standard has been completed by the...

Geingob erken ellende

1 dag gelede | Regering

Denver Kisting – Hoewel baie reeds volgens hom gedoen is om die land te verbeter, word baie meer benodig, sê pres. Hage Geingob.Tydens die herdenking...

Droogtehulp, maar nog nie noodtoestand

1 dag gelede |

Ronelle Rademeyer - Droogtehulp in die vorm van ’n bystandsplan van N$572,7 miljoen gaan in die nuwe boekjaar aangewend word om vee- en graanboere se...

Kalender 22 Maart

1 dag gelede | Kuns en vermaak

Nou aan die gang» Kosie Beukes, Die Ventertjies, Heidi en Pieter Mohr is tans op ’n Namibiese toer en tree vanaand by die Duitse klub...

Katrina-verhoor in die pylvak

1 dag gelede | Howe

Denver Kisting - Die staat sal na verwagting nog twee getuies roep voor hy sy saak teen me. Katrina Hanse-Himarwa sluit.Die verhoor, waarin dié oudgoewerneur...

Weer

1 dag gelede | Weer

BINNELAND: Sonnig en baie tot bloedig warm in die Suide. Elders sal dit gedeeltelik bewolk en baie tot bloedig warm wees met enkele donderbuie plek-plek....

Alle grappies op ‘n verhoog

1 dag gelede | Kuns en vermaak

NAM Comedy Circle vind elke laaste Woensdag van die maand by die Hilton Kalabar plaas en bied dié keer 'n kritiese blik op Namibië 29...

Dié siener is ‘die ware Jakob’

1 dag gelede | Kuns en vermaak

Die heldersiende Gerald Burger, wat jare gelede in die kol was oor die Laingsburg-vloede van 25 Januarie 1981, is van 24 April af deel van...

Ouderdom, siekte red bejaarde van tronkstraf

1 dag gelede | Howe

Denver Kisting – Hans Peter Rothen (73) se ouderdom en sy bedenklike gesondheid het hom van ’n vonnis agter tralies gered.Regter Naomi Shivute het Rothen...