Des op Swakop gegroet

“Toe ons trou aan mekaar gesweer het, het jy vir my geskryf ‘gee my jou hand dat ons kan aanstap deur die lewe tot waar die verste heuwels wag’. Nou is jy alleen oor die heel laaste heuwel. Ek kan jou nie meer sien nie, nie meer voel nie, maar jy is vir ewig in my hart. Ek sê koebaai. Die viooltjies sal weer blom. Jou Bonnie.”

Só het Des Erasmus se vrou, Anneli, Saterdag vir oulaas saam met familie, vriende en oudkollegas Saterdag van die strydros van Afrikaanse joernalistiek, mentor van vele en haar lewensmaat van byna 19 jaar gegroet.

In ’n vol NG kerk op Swakopmund is huldeblyke deur mnr. Nic Kruger (’n jare lange vriend en oudkollega), mnr. Dani Booysen (redakteur van Republikein), Kempen Erasmus (kleinseun) en ds. Manus Olivier (’n vriend) gelewer.

Sy eenvoudige kis, sonder enige tierlantyntjies, is deur ’n seun, drie kleinseuns en twee skoonseuns gedra. Ds. Leon van Rensburg van die NG Kerk het die diens gelei, soos Des 15 jaar gelede reeds versoek het. Des is in die begraafplaas op die kusdorp ter ruste gelê, met die vioolklanke van Leonard Cohen se “Hallelujah” wat saam met ’n koue suidwestewind geloei het, terwyl sy kis gesak het.