Demensie deel van wêreldplan

Henriette Lamprecht - Alzheimer Dementia Namibia (ADN) is eenparig as volle lid van Alzheimer Demensie Internasionaal (ADI) tydens die internasionale konferensie vir Alzheimer se siekte aanvaar.
Mnr. Berrie Holtzhausen, ADN se stigter en kampvegter vir demensie- en Alzheimer-lyers in Namibië, vertrek eersdaags Nederland toe om ADN se eerste internasionale lesing vir verpleegsters en vrywilligers aan te bied wat met demensie in Afrika werk.
Volgens Holtzhausen vertrek hy daarna na Edinburgh in Skotland waar hy saam met ’n span aan ’n app sal werk wat onder meer fokus op die gesondheidsrisiko’s wat die siekte vir lyers inhou. Die hoop is om die app reeds op laerskoolvlak in Namibië en ook in die res van Afrika te implementeer.
“Ek is baie opgewonde oor wat die toekoms vir mense met demensie inhou.”
Intussen het die Wêreldgesondheidsorganisasie (WHO) ’n globale plan aanvaar wat onder meer daarop gemik is om meer bewusmaking van die siekte te skep.
Die plan lei ’n nuwe era van begrip, sorg en behandeling in, maar slegs wanneer regerings daadwerklik optree.
Die plan erken demensie is nie ’n normale deel van veroudering nie en dat dié wat hierdeur geraak word, bygestaan moet word om hul lewe so goed as moontlik te lei.
Volgens die WHO ontwikkel iemand in die wêreld elke drie sekondes demensie, maar ontvang die meeste lyers nie ’n diagnose of ondersteuning nie.
Tien jaar van voortgesette bewusmaking deur die internasionale organisasie vir Alzheimer se siekte (ADI) vir globale optrede tot die groeiende demensiekrisis, het die Wêreldgesondheidsorganisasie (WHO) het ’n globale plan vir demensie aanvaar. Die plan doen ’n beroep op regerings om die doelwitte te behaal vir ’n grote bewusmaking oor die siekte, die vermindering van risiko, sowel as ondersteuning vir versorging en navorsing.
Slegs 29 regerings uit die 194 lidlande van die WHO het ’n plan vir demensie ontwikkel. Die globale plan ondersteun die dringende boodskap aan regerings om hul eie planne of beleidsrigtings te implementeer en te monitor.
“Regerings moet nou optree. Ons het ’n eenkeer-in-leeftyd-kans die houding teenoor demensie dramaties te verander van vrees en ’n gebrek aan optrede tot begrip, insluiting en ondersteuning,” het die hoof uitvoerende beampte van ADI, me. Paola Barbarino, gesê.
Demensie raak 50 miljoen mense wêreldwyd, ’n getal wat teen 2050 gaan verdriedubbel. Meer as die helfte van alle demensielyers leef in lae- en middelinkomste lande waar so min as 10% van individue gediagnoseer word.
Die voorsitter van die ADI, mnr. Glenn Rees, sê demensie is die eerste grootskaalse chroniese siekte sonder ’n kuur.
“Ten minste 1% van die koste van demensie moet nou reeds in navorsing belê word.”
Deel van die plan sluit openbare bewusmakingsprogramme en inisiatiewe rondom die siekte en opleiding vir versorgers in.