CoW verloor ronde teen baas
Hoewel Rehoboth se ganse dorpsraad steeds geskors bly, woed 'n storm opnuut by die Windhoekse munisipaliteit.
Denver Kisting - Die geskorste uitvoerende hoof van die Windhoekse stadsraad (CoW), mnr. Robert Kahimise, het 'n ronde teen sy werkgewer gewen.
CoW sal waarskynlik binne “'n kwessie van tyd” vir Kahimise terug in die tuig moet toelaat.
Dít kom nadat 'n arbitrasiegeding laat verlede week bevind het CoW se skorsing van Kahimise het nie aan die vereiste voorgeskrewe prosedures voldoen nie.
Maar, verneem Republikein op goeie gesag, CoW sal hom in alle waarskynlik heraanstel en onmiddellik weer in die pad steek.
Onberispelike inligting tot die koerant se beskikking lui dat die maatskappy, wat laat verlede jaar aangestel is om beweringe van onreëlmatighede teen Kahimise te ondersoek, steeds besig is met hul speurwerk.
Mnr. Harold Akwenye, CoW se woordvoerder, het gisteroggend bevestig die stadsraad is ingelig hy het nie die regte stappe gedoen toe hy Kahimise geskors het nie.
Akwenye het eweneens bevestig die maatskappy, wat in November aangewys is om die ondersoek teen Kahimise te lei, is nog besig daarmee.
Toe dr. Peya Mushelenga, die minister van stedelike en landelike ontwikkeling, Kahimise se skorsing bekragtig het, het hy gelas die ondersoek moet binne drie maande afgehandel word.
Dinsdag het die minister gesê hy kan hom nie in dié stadium oor die toekoms uitlaat nie.
“Ek is nie ingelig dat die ondersoek by die Windhoekse munisipaliteit afgehandel is nie en daarom kan daar nou geen sprake wees van die weg vorentoe nie.”
Die Windhoekse hoërhof het laat in 2018 Kahimise se dringende aansoek om heraangestel te word weens die manier wat hy geskors is en die beweerde finansiële ontbering wat hy ly, van die hand gewys.
Dié hof het toe gelas hy moet wag op die arbitrasieverrigtinge in Januarie vanjaar.
Kahimise is geskors in die lig van aantygings wat onder meer met die toekenning van 'n studielening aan hom verband hou, en misbruik van sy mag en eiendom van die stadsraad.
Al wat hy hy gister te sê gehad het, is dat dit met hom goed gaan. Oor die weg vorentoe was hy tjoepstil.
Een van die ander kwelpunte by die beleërde stadsraad is die skorsing vroeg verlede jaar van die stadspolisie se hoof, mnr. Abraham Kanime.
Volgens Akwenye is dié ondersoek afgehandel en die tugverhoor sal eersdaags plaasvind.
Intussen het die visepresident van die United People's Movement (UPM), mnr. Jan van Wyk, onlangs aangedring dat sy lede van die geskorste Rehoboth-dorpsraad onmiddellik heraangestel word.
Van Wyk voer aan Swapo sloer met die ondersoek ná die skorsing van die ganse dorpsraad in Maart verlede jaar, omdat die regerende party sy eie raadslede probeer beskerm.
Mushelenga het Dinsdag aan Republikein gesê: “Die Rehoboth-raadslede sal net heraangestel word wanneer ons tevrede is dat die bedrywighede van die munisipaliteit heeltemal na normaal teruggekeer het.”
Die tweede termyn van ses maande van die ministeriële verteenwoordiger by die Rehoboth-dorpsraad, me. Nathalia /Goagoses, loop vroeg vanjaar ten einde.
CoW sal waarskynlik binne “'n kwessie van tyd” vir Kahimise terug in die tuig moet toelaat.
Dít kom nadat 'n arbitrasiegeding laat verlede week bevind het CoW se skorsing van Kahimise het nie aan die vereiste voorgeskrewe prosedures voldoen nie.
Maar, verneem Republikein op goeie gesag, CoW sal hom in alle waarskynlik heraanstel en onmiddellik weer in die pad steek.
Onberispelike inligting tot die koerant se beskikking lui dat die maatskappy, wat laat verlede jaar aangestel is om beweringe van onreëlmatighede teen Kahimise te ondersoek, steeds besig is met hul speurwerk.
Mnr. Harold Akwenye, CoW se woordvoerder, het gisteroggend bevestig die stadsraad is ingelig hy het nie die regte stappe gedoen toe hy Kahimise geskors het nie.
Akwenye het eweneens bevestig die maatskappy, wat in November aangewys is om die ondersoek teen Kahimise te lei, is nog besig daarmee.
Toe dr. Peya Mushelenga, die minister van stedelike en landelike ontwikkeling, Kahimise se skorsing bekragtig het, het hy gelas die ondersoek moet binne drie maande afgehandel word.
Dinsdag het die minister gesê hy kan hom nie in dié stadium oor die toekoms uitlaat nie.
“Ek is nie ingelig dat die ondersoek by die Windhoekse munisipaliteit afgehandel is nie en daarom kan daar nou geen sprake wees van die weg vorentoe nie.”
Die Windhoekse hoërhof het laat in 2018 Kahimise se dringende aansoek om heraangestel te word weens die manier wat hy geskors is en die beweerde finansiële ontbering wat hy ly, van die hand gewys.
Dié hof het toe gelas hy moet wag op die arbitrasieverrigtinge in Januarie vanjaar.
Kahimise is geskors in die lig van aantygings wat onder meer met die toekenning van 'n studielening aan hom verband hou, en misbruik van sy mag en eiendom van die stadsraad.
Al wat hy hy gister te sê gehad het, is dat dit met hom goed gaan. Oor die weg vorentoe was hy tjoepstil.
Een van die ander kwelpunte by die beleërde stadsraad is die skorsing vroeg verlede jaar van die stadspolisie se hoof, mnr. Abraham Kanime.
Volgens Akwenye is dié ondersoek afgehandel en die tugverhoor sal eersdaags plaasvind.
Intussen het die visepresident van die United People's Movement (UPM), mnr. Jan van Wyk, onlangs aangedring dat sy lede van die geskorste Rehoboth-dorpsraad onmiddellik heraangestel word.
Van Wyk voer aan Swapo sloer met die ondersoek ná die skorsing van die ganse dorpsraad in Maart verlede jaar, omdat die regerende party sy eie raadslede probeer beskerm.
Mushelenga het Dinsdag aan Republikein gesê: “Die Rehoboth-raadslede sal net heraangestel word wanneer ons tevrede is dat die bedrywighede van die munisipaliteit heeltemal na normaal teruggekeer het.”
Die tweede termyn van ses maande van die ministeriële verteenwoordiger by die Rehoboth-dorpsraad, me. Nathalia /Goagoses, loop vroeg vanjaar ten einde.
Kommentaar
Republikein
Geen kommentaar is op hierdie artikel gelaat nie