Cites-beraad na Genève verskuif

‘Kan nie langer uitgestel word’

27 June 2019 | Omgewing
Francoise Steynberg - Die Konvensie vir die Handel in Bedreigde Spesies (Cites) se 18de beraad is weens veiligheidsredes van Colombo in Sri Lanka na die Switserse stad Genève verskuif.

Die sekretaris-generaal van Cites, me. Ivonne Higuero, het in ’n mediaverklaring gesê weens die terreuraanvalle op Paassondag in Sri Lanka sal die 18de vergadering van partye (CoP18) nou van 17 tot 28 Augustus by Cites se hoofkwartier in Genève plaasvind. Die amptelike opening sal op 18 Augustus plaasvind.

CoP18 sou van 23 Mei tot 3 Junie in Sri Lanka se hoofstad, Colombo, plaasgevind het, maar ná die aanvalle op kerke en ander aanbiddingsplekke op 21 April, wat die lewens van meer as 350 mense geëis het, is dit aanvanklik na ’n latere datum uitgestel.

“Ons betuig ons medelye met die mense van Sri Lanka oor die impak wat die gruweldade op hulle gehad het,” het Higuero gesê.

Cites se sekretariaat het in April gesê hy wil nie duisende deelnemers aan die beraad se lewens in gevaar stel nie, en het middel Junie aangekondig CoP18 is weens veiligheidsredes na Genève verskuif.

“Ons het hierdie besluit ná ernstige oorweging en diep gesprekke met die regering van Sri Lanka geneem. Nadat ons ’n verslag van die Verenigde Nasies se departement van veiligheid en sekuriteit oor die situasie in Sri Lanka ontvang het, het ons besluit om die beraad te skuif,” het Higuero gesê.

“Die buitengewone omstandighede verg groot opoffering van die sekretariaat. CoP18 kan egter nie langer uitgestel word nie, omdat belangrike besluite oor die handel in wildlewe geneem moet word.”

Volgens die verklaring sal die uitgestelde beraad baie kleiner en eenvoudiger wees en lidlande sal geld vir moderne toerusting soos groot videoskerms moet bewillig.

SHIFETA LEI NAMIBIë

Die minister van die omgewing en toerisme, mnr. Pohamba Shifeta, sal die Namibiese afvaardiging na Genève lei.

Namibië is een van 90 lande wat 57 voorstelle vir Cites se CoP18 voorgelê het. Namibië versoek onder meer dat sy witrenosterbevolking van Lys I (Appendix I) tot Lys II (Appendix II) verander word om spesifiek toegelaat te word om in lewende witrenosters handel te dryf.

Voorstelle vir groot, ikoniese soogdiere is gewoonlik in omstredenheid gehul. Een so ’n omstrede voorstel van verskeie Afrikalande is om olifante in Namibië, Botswana, Suid-Afrika en Zimbabwe van Lys II na Lys I te verander, ’n skuif om “eenmalige” ivoorverkope in die toekoms moontlik te maak.

Die Cites-beraad vind elke drie jaar plaas, waartydens handelsreëls verander word.

Die lys van ’n spesie in Lys 1 verhoed alle kommersiële internasionale handel, terwyl spesiale permitte geld vir handel in die spesies wat in Lys II gelys is.

Die kwessie oor die ophoop van wildprodukte en hoe om dit te bestuur, sal een van vele implementeringsuitdagings van CoP18 wees.

Ander kwessies is die opsporing van wildprodukte deur handelskettings, en verdere maatreëls om spesies te reguleer wat in aanhouding geteel word.

Pogings om verbruikersaanvraag vir spesifieke wildprodukte te verminder, sal ook aangewend word om onwettige wildhandel te voorkom.

Dit sal die finale Cites-beraad wees voor lande in 2020 in Beijing, China, vir die Konvensie oor Biologiese Diversiteit sal byeenkom.

Soortgelyk

 

Weduwee en haar eks lank tronk toe vir moord...

5 ure gelede | Howe

Denver Kisting – Rachel Rittman (48) en haar 35-jarige eks, Ryno du Preez, is vanoggend onderskeidelik lewenslange tronkstraf en 30 jaar opgelê vir die moord...

Spuite, pille nie by klinieke

15 ure gelede | Ministeries

Henriette Lamprecht – Tekorte aan voorbehoedmiddels wat voorbehoedpille en –inspuitings insluit, word tans by openbare gesondheidsgeriewe in die land ondervind.Die direkteur van die ministerie van...

Sakkepakke op Lüderitz

15 ure gelede | In beeld

Tanja Bause - Die eerste trein in meer as 20 jaar het Lüderitz in Augustus vanjaar binnegery. Die trein, wat uit twee lokomotiewe en 20...

Gróót oë op Jan Taks

15 ure gelede | Ministeries

Jo-Maré DuddyVerbruikers wat voortaan BTW van 15% op suiker sal moet betaal, is een van die rits belastingaankondigings wat in vanmiddag se halfjaar-begrotingshersiening verwag word.Kenners...

Drie dae, sewe kinders glo verkrag

15 ure gelede | Misdaad

Sewe minderjarige meisies, waarvan die jongste vier en die oudste 15 jaar oud is, het na bewering binne ’n kwessie van drie dae die jongste...

Pushing the boundaries

15 ure gelede | Skole

Ester Kamati “I enjoy coming up with ideas, often random, often impractical, but occasionally valuable,” says young businesswoman of the year Hilja Eelu. Eelu is...

Children need to move

15 ure gelede | Onderwys

Children spend the majority of their day sedentary, behind desks or in front of a screen.The power of movement has been stolen from these children....

Weer vir 22 Oktober

15 ure gelede | Weer

BINNELAND: Gedeeltelik bewolk en bloedig warm in die Noordooste, andersins sonnig en baie tot bloedig warm. Winderige toestande sal oor die binneland voortduur. KUS: Gedeeltelik...

Elke refleks ’n spesifieke doel

15 ure gelede | Onderwys

Henriette Lamprecht - Primitiewe refleksbewegings wat baba vanaf bevrugting en dwarsdeur hul eerste lewensjaar uitvoer, bedraad die brein en versterk die liggaam.Vir elke refleks is...