Chinese maan teen xenofobie

Kavango se inwoners is ‘keelvol’

04 January 2021 | Regering
Kenya Kambowe op Rundu


Die Chinese ambassade maan teen xenofobie nadat ontevrede inwoners in die twee Kavangostreke verlede week na Rundu opgeruk het nadat die streeksgoewerneur van Kavango-Oos, mnr. Bonifatius Wakudumu, ’n Chinees gebore sakeman as sy spesiale raadgewer aangestel het.

Ná sterk teenkanting van Kavango-inwoners het Wakudumu intussen mnr. Charlie Min Xie se aanstelling herroep, maar inwoners het steeds verlede Dinsdag met hul protesoptog voortgegaan.

Die Chinese ambassade het by navraag van Republikein op die herroeping van Xie se aanstelling gereageer.

“Mnr. Charlie Xie Min is al lankal ’n genaturaliseerde Namibiese burger. Sy aanstelling en verwydering van sy posisie is suiwer ’n interne saak van Namibië,” het die woordvoerder van die Chinese ambassade, me. Lu Hairong, aan Francoise Steynberg gesê.

Sy sê China volg nog altyd die beginsel van nie-inmenging in ander lande se interne aangeleenthede en China sal nooit sy wil op ander afdwing nie.

“Die vriendskaplike samewerking tussen China en Namibië is nog altyd uitgevoer volgens wedersydse respek, gelykheid en wedersydse voordeel, wat vir albei lande tasbare voordele meegebring het.”

Lu sê China respekteer die reg van die Namibiese nasie om hul pleidooie op vreedsame wyse uit te spreek.

“Ons hoop ook dat die Namibiese vriende die samewerking tussen China en Namibië rasioneel kan sien en waaksaam sal wees teen individue wat vreemdelingehaat aanhits, om sodoende die gevoelens van plaaslike Chinese vriende nie per ongeluk seer te maak nie,” het Lu gesê.

‘WAKUDUMU ONBEVOEG’

Kavango-inwoners beskryf Wakudumu as “onbevoeg vir sy pos, ’n verdelende leier en imperialistiese agent” en beskuldig hom daarvan dat hy hulle uitverkoop het en nie in belang van die gemeenskappe van die Kavango optree nie.

Die woordvoerder van die protesgroep, mnr. Petersen Kambinda, sê ’n sterk waarskuwing word aan leiers in die gemeenskap uitgestuur wat nie die belange van die Kavango-mense op die hart dra nie.

“Ons Kavango-mense staan bekend as goeie mense, maar enige iemand wat nie ons belange op die hart dra nie, sal voor stok gekry word. Die Kavango is nou wakker,” het hy gesê.

“Waarom het Wakudumo ’n Chinees gebore burger ten koste van plaaslike mense aangestel? Watter vaardighede het hierdie Charlie-ou wat nie in die Kavango-Oosstreek, in die 121 kiesafdelings of in die 14 streke van Namibië gevind kan word nie?” word in die klagskrif gevra wat ook aan pres. Hage Geingob gestuur is.

POLISIEHOOF MAAN TEEN OPTOGTE

Intussen het die Namibiese polisiehoof, lt.genl. Sebastian Ndeitunga, gewaarsku mense wat aan protesoptogte deelneem, sal weens die oortreding van die Covid-19-maatreëls in hegtenis geneem word.

Hy het ’n waarskuwing aan organiseerders van protesoptogte tydens die Covid-19-pandemie uitgestuur dat hulle in hegtenis geneem en aangekla sal word indien gesondheidsprotokol nie gevolg word nie.

Dié opdrag is deur die polisiehoof aan alle streekskommissarisse gegee om met onmiddellike effek uit te voer.

By die protesoptog was meer as die toegelate 50 mense, wat geen sosiale afstand gehandhaaf het nie. Sommige optoggangers het ook nie maskers gedra nie.

“Wat by die goewerneur se kantoor op Rundu gebeur het, mag nie herhaal word nie. Dit was totale agtelosigheid van die polisie, die organiseerders en die burgers,” het Ndeitunga gesê.

Ndeitunga wys daarop dat mense wel die reg het om aan protesoptogte deel te neem, maar hulle moet in ag neem dat die pandemie lewens eis.

“Ons het nie hier met kindergarten-kinders te doen nie. Hierdie is volwasse mense wat gesien het hoe mense weens die pandemie sterf. Hulle prioritiseer protesoptogte en vergeet dat hul lewens in gevaar is,” het die polisiehoof gemaan.

[email protected]

Soortgelyk

 

Gesondheidswerkers, leerlinge en onderwysers deel van 343 nuwe gevalle

5 ure gelede | Gesondheid

Sewe Covid-19-verwante sterftes is vandag aangekondig en wel vier in Windhoek, twee in Swakopmund en een in Grootfontein. Die sterftes in Windhoek sluit 'n 63-jarige...

Moller, Hatuikulipi se belange onder vergrootglas

20 ure gelede | Misdaad

Hoofredaksie – Een van die transaksies wat deur die Teenkorrupsie-kommissie (ACC) as deel van die Fishrot-ondersoek gefynkam word, is 'n bedrag van N$8 miljoen wat...

Rekening van N$151 000 bly toe 'jakkals' gly

20 ure gelede | Misdaad

Francoise Steynberg – 'n Vermeende glyjakkals wat vir 'n maand saam met sy gesin in 'n gastehuis op Swakopmund gebly en glo nie betaal het...

Mans vas oor vervalsing van Covid-19-toetsuitslae

20 ure gelede | Misdaad

Kristien KrugerTwee Zimbabwiese mans is Saterdag omstreeks 12:00 op Katima Mulilo in hegtenis geneem vir die besit was vervalste Covid-19 laboratoriumtoetsverslae van PathCare Namibië.Die mans...

Reënweer bring groot skade

20 ure gelede | Weer

Kristien Kruger – Terwyl Namibië die derde week van swaar neerslae binnegaan, is groot skade reeds aan paaie, landerye en ander infrastruktuur aangerig. Windhoekers is...

Weer vir 11 Januarie 2021

20 ure gelede | Weer

BINNELAND: Gedeeltelik bewolk en baie warm in die Noordweste, verre Weste en dele van die //Kharasstreek. Elders sal dit bewolk en warm tot baie...

Regering slaan toe op klaringsagente

20 ure gelede | Regering

Phillepus Uusiku – Die regering is in die finale fase van die instelling van strenger maatreëls vir die lisensiëring van klaringsagente.Die instellings beoog om die...

Nafau wen in hof teen Shoprite

20 ure gelede | Arbeid

Kristien Kruger en Adolf Kaure – Stakende Shoprite-werknemers was Vrydagmiddag verjuig toe die hoërhof in Windhoek beslis het dat ’n interdik teen die Shoprite-winkelgroep uitgereik...

Op die spoor van Hardapdam se opvangsgebiede

20 ure gelede | Infrastruktuur

Kallie Pauw (gasskrywer)Die onlangse wonderlike reën in groot dele van Namibië en verslae daaroor en foto's van vol riviere en dansende boere het mense (soos...