Capitec reageer op aantygings van Viceroy

'Verkeerde en misleidende gevolgtrekkings gemaak'

07 February 2018 | Bankwese
Nellie Brand-Jonker

Capitec het Maandagoggend in ’n lang verklaring in meer besonderhede gereageer op drie spesifieke aantygings in die Viceroy-verslag wat verlede week daartoe gelei het dat Capitec se aandeelprys slae gekry het.

Dit is die tweede verklaring waarin Capitec op die JSE se nuusdiens, Sens, op van die aantygings reageer. Die vorige een is verlede Dinsdag uitgereik.

Volgens Capitec sal hy in nog meer besonderhede reageer namate hy deur die verslag werk.

Maandagoggend het hy op die volgende gevolgtrekkings in die Viceroy-verslag gereageer en dit as verkeerd en misleidend beskryf:

1. Die leningsboek se geldwaarde klop nie.

Capitec bevestig dat die waarde van sy leningsboek korrek is en ontken enige wanvoorstelling. Viceroy het beweer dat Capitec lenings herskeduleer en dit dan as nuwe lenings aandui om só die syfer te vergroot.

2. Die uitstaande leningsboek word met meer as R11 miljard weer aangegee omdat dit bedrae insluit wat reeds afgeskryf moes gewees het.

Capitec ontken dat die syfer oordrewe is en voer die volgende aan:

* Viceroy gebruik inligting wat nie duidelik vergelykbaar is nie en hy gebruik nie inligting wat geredelik beskikbaar in die openbare domein is nie.

“Ons glo dit is doelbewus so gedoen om die vals indruk te skep dat Capitec se agterstallige lenings onderspeel is.”

Volgens Capitec is sy ontleding van agterstallige skuld anders as dié van die ander kredietverskaffers waarmee Viceroy hom vergelyk omdat hy afskrywings en voorsiening vir slegte skuld anders hanteer.

Capitec sê ander kredietverskaffers sluit lenings in wat langer as 90 dae agterstallig is terwyl Capitec dit ná 90 dae afskryf of sodra die agterstallige skuld aan eksterne skuldinvorderaars oorhandig word, welke ook al eerste gebeur.

“Die weglating van hierdie feite, saam met Viceroy se verslag wat daarop sinspeel dat Capitec ’n onmoontlik lae agterstallige syfer en reuseafskrywings het, help Viceroy om twyfel en onsekerheid oor Capitec te saai in plaas daarvan om insig te bied oor Capitec se konserwatiewe model vir die voorsiening van slegte skuld.”

* Viceroy kom tot die gevolgtrekking dat Capitec se voorsiening en afskrywing as persentasie van sy bruto leningsboek wesenlik laer is as dié van ander kredietverskaffers.

Viceroy sê Capitec se voorsiening vir slegte skuld en afskrywings moet verdubbel, naamlik dat hy nog R5,9 miljard vir slegte skuld moet voorsien en nog R5,4 miljard bykomend moet afskryf.

Die bank sê as sy afskrywingsbeleid toegepas word op die ander kredietverskaffers met wie Viceroy hom vergelyk, sal hul agterstallige lenings met 67% daal.

Hy sê as Viceroy appels met appels wil vergelyk, moet hy by die ander kredietverskaffers dus die lenings uitsluit wat langer as 90 dae agterstallig is.

3. Lenings wat nie betaal word nie, word verleng deur nuwe lenings uit te reik en aanvangsgeld op geherskeduleerde lenings te hef.

Capitec ontken dat hy onbetaalde lenings verleng en sê hy vra nie aanvangsgeld as hy lenings herskeduleer nie.

Die bank sê daar is ’n verskil tussen nuwe skuld en konsolidasies en bestaande lenings wat geherskeduleer word.

* Nuwe lenings: Die kredietverskaffingsproses word gevolg wat ’n omvattende ontleding van ’n kliënt se gedrag insluit en of hy dit kan bekostig deur die ontleding van inligting van kredietburo’s, bankstate en salarisstrokies. Daarop word aanvangsgeld en maandelikse diensgeld betaal.

* Meer as een lening of konsolidasie: Wanneer bestaande kliënte vir verdere krediet aansoek doen, word ’n volle kredietontleding gedoen. As hy kwalifiseer vir verdere skuld, kan krediet verleen word met ’n nuwe kredietooreenkoms, bykomend tot die bestaande ooreenkoms, of die kliënt kan sy bestaande skuld konsolideer in ’n nuwe kredietooreenkoms.

Die opsie is net beskikbaar vir kliënte wat nie agterstallig is met hul terugbetalings nie en vir kliënte wat ’n bevredigende krediettelling het.

Aanvangsgeld word net op nuwe lenings gevra of die bedrag van die nuwe krediet. Net die nuwe kredietbedrag word ingesluit in Capitec se syfers oor nuwe krediet wat toegestaan is.

Die voordeel van die gekonsolideerde lenings sluit in dat die kliënt nie die ekstra R68,40 maandelikse diensgeld op die bykomende lening hoef te betaal nie. Die bankkoste is laer omdat dit een debietorder is en dis gerieflik om net een lening te bestuur.

* Herskedulering: Volgens Capitec is die herskedulering van skuld daarop gemik om kliënte by te staan wie se omstandighede verander het sedert hulle die eerste lening gekry het en om die invorderingsproses te bestuur. Dit vind tipies plaas wanneer ’n kliënt sukkel om sy bestaande skuld terug te betaal of dink hy gaan probleme hê om sy skuld te betaal.

Die bank sal dan herskedulering oorweeg op grond van voorgeskrewe kriteria. Geen aanvangsgeld word op geherskeduleerde lenings gevra nie omdat dit nie nuwe krediet is wat verskaf word nie. Herskedulering is ’n formele wysiging aan ’n bestaande leningskontrak. Dit vorm ook nie deel van Capitec se syfers oor nuwe krediet nie.

Die voorsiening wat vir die slegte skuld gemaak is ten tye van die herskedulering val nie weg nie. Die voorsiening word stelselmatig per maand verwyder namate die kliënt terugbetaal.

Dit is verkeerd van Viceroy om te beweer dat Capitec aanvangsgeld op geherskeduleerde lenings vra, lui die verklaring. - Netwerk24

Soortgelyk

 

‘Burger in rou’ bepleit genesing

9 ure gelede | Kuns en vermaak

Ronelle Rademeyer - ‘n Optog vind vanaand (Dinsdag) vanaf die Goethe Instituut se kultuursentrum na die Alte Feste-museum plaas waar ‘n gedramatiseerde visuele uitbeelding van...

Windhoek se waterverbruik bly té hoog

10 ure gelede | Omgewing

Windhoekers het die afgelope week 7% méér water gebruik as wat toelaatbaar tydens droogtetye is en kon weereens nie die vereiste teiken van 10% besparings...

Brexit: Uitstel bied uitvoerders blaaskans

20 ure gelede | Ministeries

Ronelle Rademeyer - Die moontlike negatiewe impak wat ‘n haakplek in die onderhandelinge vir ‘n nuwe handelsooreenkoms met Brittanje op uitvoerders kon hê, is deur...

Erindi: Chinese het nié aanbod gemaak

20 ure gelede | Ministeries

Elvira Hattingh - Die eienaars van die Erindi Private Wildreservaat het nie ‘n koopaanbod van enige Chinese burgers ontvang nie. Mnr. Sisa Namandje, Erindi se...

Geen laatregistrasie vir nasionale eksamens

20 ure gelede | Ministeries

Henriette Lamprecht - Geen laatregistrasie sal ná spertye gedoen word vir deeltydse studente vir die Junior Sekondêre Sertifikaat (graad 10) of voltydse sowel as deeltydse...

Leeujagters geskiet

20 ure gelede | Omgewing

Ileni Nandjato – Die Namibiese polisie in die Oshanastreek het ‘n saak van poging tot moord geopen ná me. Amalia Sheya (51), ‘n werknemer van...

Weer vir 26 Maart

20 ure gelede | Weer

BINNELAND: Gedeeltelik bewolk en baie tot bloedig warm in die Suide en die Zambezistreek, andersins gedeeltelik bewolk en baie tot bloedig warm met geïsoleerde donderbuie...

Kriminalisering van aborsie 'werk nie'

20 ure gelede | Regering

Henriette LamprechtDie hoë siekte- en sterftesyfer verwant aan onveilige, onwettige aborsies bewys die kriminalisering van aborsie keer onwettige aborsies nie werklik nie.“Hoewel dit wyd erken...

N$210 miljoen vir registrasiepersoneel

20 ure gelede | Regering

Denver KistingMnr. Theo Mujoro, die Verkiesingskommissie van Namibië (ECN) se uitvoerende hoof, sê die N$67 miljoen wat aan hulle toegeken is, is nie voldoende om...