Brandstofsmokkelary uit Angola onwettig

Elvira Hattingh - Nie net is die smokkel van brandstof uit Angola na Namibië onwettig en bestaan daar kommer oor die gehalte daarvan nie, maar hou dit ‘n ernstige bedreiging in vir wettige brandstofverkopers – tot so ‘n mate dat verkopers op Oshikango glo reeds hul deure moes sluit.

Die ministerie van myne en energie het van 3 tot 6 Desember ‘n inligtingsveldtog in die noordelike streke van die land van stapel gestuur om bewustheid te skep oor die onwettige invoer en verkoop van brandstof uit Angola.

Die adjunkminister van myne en energie, me. Kornelia Shilunga, het as deel hiervan toesprake op Oshakati en in die Omusatistreek gehou en gesê dis onwettig vir ongelisensieerde individue om petroleumprodukte te smokkel en dit is ‘n verdere oortreding om dit oor die grens te neem sonder om dit by doeanebeamptes aan te meld.

Sy het bygevoeg sulke individue ontduik dus ook belasting, asook regeringsagentskappe se brandstofheffings.

“Die smokkelary strek ook tot nadeel van wettige brandstofhandelaars, wat nou in terme van volumes met die onwettige invoere moet meeding.

“Boonop het ondersoeke getoon hierdie gesmokkelde brandstof word in gevaarlike houers geberg, wat ‘n gevaar vir die omgewing inhou en op so ’n manier verkoop word dat dit ‘n gesondheidsrisiko vir mense is.”

GEHALTE

Shilunga sê daar is probleme met die gehalte van ingesmokkelde brandstof.

“Ten spyte daarvan dat ons motors wel kortstondig op brandstof uit Angola kan ry, is die swael-inhoud daarvan só hoog dat dit onversoenbaar is met plaaslike brandstofspesifikasies en -standaarde.

“Nie net is dit skadelik vir voertuigenjins om brandstof te verbrand wat ‘n hoër graad van swael bevat nie, maar hierdie voertuie se uitlaatgasse is ook ontoelaatbaar hoog,” het Shilunga gesê.

Volgens haar wek die gebruik hiervan kommer oor omgewingskwessies, veral in die lig daarvan dat Namibië 'n ondertekenaar van internasionale konvensies teen besoedeling en koolstofvrystelling is.

“Boonop het die SADC-streek ‘n doelwit gestel dat alle lande teen 2030 na lae swael en ‘skoner’ brandstof moet oorskakel,” het sy gesê.

Sy het gesê in hierdie verband het Namibië reeds stappe gedoen en 93 Petrol uitgefaseer, terwyl 50 ppm diesel plaaslik bekend gestel is.

“Teen die einde van die jaar sal ons 500 ppm diesel uitfaseer en geleidelik 10 ppm diesel plaaslik bekend stel. Ons werk hard om seker te maak ons beweeg saam met die wêreld in terme van skoner brandstof.”

IDENTIFISEER ONWETTIGE BRANDSTOF SÓ

Shilunga sê daar word dikwels gevra wat met Angolese brandstof fout is en hoe ‘n gewone burger sal kan bepaal of die brandstof wat hulle koop wettig is of nie?

“Die ministerie het voorheen al op dié vrae in die media gereageer.

“Daar is niks fout met Angolese brandstof nie, solank dit binne die grense van Angola gebruik word. Elke land het sy eie wette en regulasies en Angolese brandstof voldoen nie aan ons standaarde nie. Daarom kan dit nie in sy huidige vorm op enige plek in Namibië verkoop of geberg word nie.”

Sy sê mense sal kan agterkom of brandstofverkope onwettig is deur die manier waarop dit van die hand gesit word.

“Dit word nie by volwaardige diensstasies verkoop nie en ook nie in byvoorbeeld petrolpompe gehou nie. Dit word agter toe deure verkoop op plekke waar dit in kannetjies of ander onveilige houers geberg word.”

Shilunga het gesê die bedrywighede benadeel wettige besighede, wat plaaslike inwoners van werksgeleenthede voorsien.

“As die probleem nie getakel word nie, het dit die potensiaal om die eienaars van diensstasies se besighede te vernietig. So iets kan verdere verwoesting in die reeds sukkelende ekonomie saai,” het sy gesê.

Die adjunkminister het bygevoeg die media het berig sommige diensstasies in Oshikango ly reeds ernstige verliese en van hulle moes reeds sluit.

Hiervolgens kan brandstofsmokkelaars glo by Engela, Ongenga, Eenhana, Outapi en selfs by Oshakati aangetref word.