Besef die erns van grondhervorming
Dit is noodaaklik dat kommersiële grondeienaars met die president saamwerk ten einde vrede en politieke stabiliteit te behou.
Elvira Hattingh - “Ek lê nagte wakker om te dink oor wat ons méér kan doen.
“Ek erken ook dat meer gedoen kan word.”
So het die president van die Namibië Landbou-unie (NLU), mnr. Ryno van der Merwe, die afgelope naweek op Republikein se vrae gereageer ná afloop van die tweede nasionale grondkonferensie, waar ingrypende besluite oor die toekoms van grondbesit en -hervorming geneem is.
“My grootste bekommernis is hoe om ‘n besef onder alle grondeienaars tuis te bring van die erns en dringendheid van die president se boodskap, asook watter groot uitdaging en verantwoordelikheid op ons skouers rus.
“Die president het Vrydag ‘n harde en reguit maar ook ‘n dringende boodskap vir almal gehad – spesifiek vir grondeienaars – oor ongelykheid en armoede wat oorwin moet word sodat elke Namibiër ‘n waardige lewensbestaan kan voer. Hy het ook direk met wit Namibiërs gepraat.
“Hy het dit duidelik gestel dat die huidige status quo nie langer verduur sal word nie,” het Van der Merwe gesê.
Van der Merwe sê die feit dat die president en senior amptenare deurlopend tydens die konferensie teenwoordig was, was vir hom ‘n aanduiding van hoe ernstig hulle oor die kwessie was. “Dit wys die president wou persoonlik luister na elkeen se behoeftes en standpunte.”
BESLUIT OOR EIE TOEKOMS
Hy sê alhoewel die NLU reeds dekades gelede besluit het om deur georganiseerde landbou deel te wees van die oplossing, asook vrywillig aan grondhervormingsprosesse deelgeneem en insette gelewer het, rus daar ‘n groot verantwoordelikheid op kommersiële boere se skouers om voorts selfs méér te doen.
“Ons moet onsself afvra: Bly ons deel van die oplossing? Die enigste ander keuse is om deel te wees van die probleem en nié bydraes te lewer nie. In die geval moet ons weet: Daar sal vir ons besluit word en dié besluite sal nie noodwendig aangenaam wees nie,” het Van der Merwe gesê.
“Elkeen moet homself egter eerlik afvra wat hy meer kan doen, en in die antwoord aan jouself, neem jy ‘n besluit oor jou eie toekoms.
“As jy besluit om net voort te gaan soos voorheen, wag daar ‘n verrassing. Die punt is ons kan nie aanhou om slegs die minste te wil doen nie.
“Ons as georganiseerde landbou en as die leiers van baie grondeienaars, moet die president se hand vat en na sy versoeke luister, sodat ons die land ‘n plek kan maak waar elke Namibiër in vrede en politieke stabiliteit kan voortleef.
“Daar is natuurlik altyd hoop vir die kommersiële boere wat deel van die oplossing is,” het Van der Merwe gesê.
“Ons kan egter nie langer verwag dat die NLU namens ons sal praat nie; mooipraatjies is nie meer goed genoeg nie. Die president soek dade en aksie.”
NLU BESKOU AS DIÉ WAT HET
Van der Merwe het ook gesê tydens die konferensie het almal behoeftes en eise gehad om aan die president te stel.
“Moet hy alleen gehoor hieraan gee? Dit is nie moontlik nie. Elke landsburger sal homself moet afvra wat hy gaan bydra,” het Van der Merwe gesê.
Hy sê tydens die konferensie het hy ook besef die NLU word beskou as verteenwoordiger van dié wat het.
“Alle vingers wys na ons – ‘n minderheidsgroep wat die ekonomie beheer. Ons kon ons standpunte stel en insette lewer, maar dalk nie altyd sê wat almal graag wou hoor nie.
“Tog was ons teenwoordigheid daar ook ‘n geleentheid om welwillendheid te kweek en te netwerk. Daar was ook waardering vir ons teenwoordigheid en sommige konferensiegangers het hul waardering daarvoor uitgespreek dat ons in die konferensie bly sit het. Die konferensie het gehoor hóé ons dink, maar grond is egter ‘n sterk emosionele en politieke kwessie.”
“Ek erken ook dat meer gedoen kan word.”
So het die president van die Namibië Landbou-unie (NLU), mnr. Ryno van der Merwe, die afgelope naweek op Republikein se vrae gereageer ná afloop van die tweede nasionale grondkonferensie, waar ingrypende besluite oor die toekoms van grondbesit en -hervorming geneem is.
“My grootste bekommernis is hoe om ‘n besef onder alle grondeienaars tuis te bring van die erns en dringendheid van die president se boodskap, asook watter groot uitdaging en verantwoordelikheid op ons skouers rus.
“Die president het Vrydag ‘n harde en reguit maar ook ‘n dringende boodskap vir almal gehad – spesifiek vir grondeienaars – oor ongelykheid en armoede wat oorwin moet word sodat elke Namibiër ‘n waardige lewensbestaan kan voer. Hy het ook direk met wit Namibiërs gepraat.
“Hy het dit duidelik gestel dat die huidige status quo nie langer verduur sal word nie,” het Van der Merwe gesê.
Van der Merwe sê die feit dat die president en senior amptenare deurlopend tydens die konferensie teenwoordig was, was vir hom ‘n aanduiding van hoe ernstig hulle oor die kwessie was. “Dit wys die president wou persoonlik luister na elkeen se behoeftes en standpunte.”
BESLUIT OOR EIE TOEKOMS
Hy sê alhoewel die NLU reeds dekades gelede besluit het om deur georganiseerde landbou deel te wees van die oplossing, asook vrywillig aan grondhervormingsprosesse deelgeneem en insette gelewer het, rus daar ‘n groot verantwoordelikheid op kommersiële boere se skouers om voorts selfs méér te doen.
“Ons moet onsself afvra: Bly ons deel van die oplossing? Die enigste ander keuse is om deel te wees van die probleem en nié bydraes te lewer nie. In die geval moet ons weet: Daar sal vir ons besluit word en dié besluite sal nie noodwendig aangenaam wees nie,” het Van der Merwe gesê.
“Elkeen moet homself egter eerlik afvra wat hy meer kan doen, en in die antwoord aan jouself, neem jy ‘n besluit oor jou eie toekoms.
“As jy besluit om net voort te gaan soos voorheen, wag daar ‘n verrassing. Die punt is ons kan nie aanhou om slegs die minste te wil doen nie.
“Ons as georganiseerde landbou en as die leiers van baie grondeienaars, moet die president se hand vat en na sy versoeke luister, sodat ons die land ‘n plek kan maak waar elke Namibiër in vrede en politieke stabiliteit kan voortleef.
“Daar is natuurlik altyd hoop vir die kommersiële boere wat deel van die oplossing is,” het Van der Merwe gesê.
“Ons kan egter nie langer verwag dat die NLU namens ons sal praat nie; mooipraatjies is nie meer goed genoeg nie. Die president soek dade en aksie.”
NLU BESKOU AS DIÉ WAT HET
Van der Merwe het ook gesê tydens die konferensie het almal behoeftes en eise gehad om aan die president te stel.
“Moet hy alleen gehoor hieraan gee? Dit is nie moontlik nie. Elke landsburger sal homself moet afvra wat hy gaan bydra,” het Van der Merwe gesê.
Hy sê tydens die konferensie het hy ook besef die NLU word beskou as verteenwoordiger van dié wat het.
“Alle vingers wys na ons – ‘n minderheidsgroep wat die ekonomie beheer. Ons kon ons standpunte stel en insette lewer, maar dalk nie altyd sê wat almal graag wou hoor nie.
“Tog was ons teenwoordigheid daar ook ‘n geleentheid om welwillendheid te kweek en te netwerk. Daar was ook waardering vir ons teenwoordigheid en sommige konferensiegangers het hul waardering daarvoor uitgespreek dat ons in die konferensie bly sit het. Die konferensie het gehoor hóé ons dink, maar grond is egter ‘n sterk emosionele en politieke kwessie.”
Kommentaar
Republikein
Geen kommentaar is op hierdie artikel gelaat nie