Behuisingsprojek van N$4,3 miljard uit die blokke

Reusebelegging hupstoot vir ekonomie

16 August 2019 | Sakenuus
Augetto Graig - Die aarde het gister aan die noordoostelike kant van Windhoek begin skud toe stootskrapers en ander swaarvoertuie aan die werk gespring het met die ontwikkeling van 'n N$4,3 miljard-behuisingsprojek.

Oor die volgende vyf jaar sal 4 500 nuwe huise ter waarde tussen N$400 000 en N$900 000 elk, daar gebou word.

Die amptelike sooispitseremonie is Woensdag deur die visepresident, mnr. Nangolo Mbumba, behartig. Volgens hom is die Ongos-projek noodsaaklik vanweë die brandende nasionale terkort aan bekostigbare gehaltebehuising en sanitasie. Hy sê die nasionale agterstand in die voorsiening van huise beloop reeds 110 000, en die aanvraag in die hoofstad groei jaarliks met 4%. Teen 2030 sal Windhoek se inwonertal 645 355 beloop, sê hy.

Volgens hom kom die ontwikkelaars pres. Hage Geingob se oproep na om nasionale ontwikkeling te ondersteun. “Ontwikkeling bring nog ontwikkeling. Sit en niks doen nie, bring niks,” sê hy. “Hierdie jong Namibiërs het gekies om deel van die oplossing te wees om die akute tekort aan bekostigbare behuising in die stad van Windhoek te takel,” sê hy. Die direkteure van die maatskappy is mnre. Americo de Almeida, Isak Nahum, Chris Nieuwoudt en Jarik Botha - almal in hul laat dertigerjare.

Mnr. Reagon Graig, voorsitter van die maatskappy Ongos Valley, sê dié yslike projek word deur Namibiërs vir Namibiërs aangepak. “Vir ons gemeenskappe en vir ons stad,” sê hy.

“Alhoewel die voetwerk ses jaar geneem het, is vandag maar die begin van 'n 20-, 30-, of 40 jaar-projek, wat dalk die res van my leeftyd sal neem om te voltooi,” sê hy. “As dit nie ons is nie, wie dan. As dit nie nou is nie, wanneer dan?” wou hy weet. “Ek verbind my daartoe om dit wat ons belowe, te lewer,” sê hy.

Die Ongos-belofte is om 30 000 huise oor die volgende 20 jaar op 'n gedeelte van 1 743 hektaar van plaas Ongos, wat ses jaar gelede gekoop is, te bou.

Die ontwikkelaars beloof om ook te sorg vir 20 skole, gesondheidsfasiliteite, paaie, vullisverwydering en rioolstelsels deur vennootskappe met kundiges te sluit, sê Graig. Hy sê 4 000 permanente werksgeleenthede en 10 000 deeltydse werksgeleenthede sal geskep word.

Graig het klem gelê op inklusiewe ontwikkeling met gemeenskappe se insette en deelname. Innoverende finansiële oplossings word gevind om die bekombaarheid van die huise te vermaklik, sê hy.

Die verkoopskantoor vir Ongos-huise het Maandag in Windhoek se sentrale sakegebied geopen. Teen eergister is drie kontrakte vir nuwe huise reeds goedgekeur, met tien wat vir goedkeuring wag, sê die besturende direkteur van Nedbank Namibia, mnr. Lionel Matthews.

Nedbank verskaf die finansiering vir die N$1,2 miljard van die eerste fase van die projek. Matthews sê die skaal van die ontwikkeling is groter as wat tot nou toe in die land gesien is. “Die impak op ons nasionale ekonomie in 'n tyd gekenmerk deur finansiële soberheid, gaan groot wees en dit is belangrik om nuwe paaie van volhoubare groei en werkskepping te vind. Die Ongos Valley-stigters verdien al die krediet vir die monumentale ontwikkeling. Americo, jy en jou span is visionêre. Met hierdie tipe jong, talentvolle, passievolle leierskap met integriteit, kan Namibië, en die hele wêreld, net 'n beter plek wees,” sê hy.

Mnr. Martin Inkumbi, uitvoerende direkteur van die nasionale ontwikkelingsbank (DBN), sê Namibië kan nie die vrugte van ekonomiese ontwikkeling vier as die voordele nie families begunstig nie. “Dit is belangrik om die fondament vir toekomstige generasies te lê en die besit van 'n woning is die hoogtepunt daarvan.”

Hy sê Ongos is 'n merkwaardige belegging vir die ontwikkelingsbank in die middeltermyn, maar die bank sien nog kans om dit vir die langtermyn ook aan te pak. “Subkontrakteurs wat hierop werk kan ons ook nader vir finansiering,” sê hy. "As jy die deure vir behuising oopmaak, is ons deur altyd vir jou oop,” sê hy.

Standard Bank Namibië en Absa Bank in Suid-Afrika is ook vernootfinansierders vir die projek.

Soortgelyk

 

KOLLIG Voorblad

1 dag gelede | Byvoegsels

Swakop hou Makietie bl. 4

ECN gaan Itula se aansoek teenstaan

1 dag gelede | Politiek

Denver Kisting – Vanweë die beweerde negatiewe uitwerking van elektroniese stemtoestelle (EVM’s) in die afgelope presidensiële verkiesing moet die proses tersyde gestel word.Dr. Panduleni Itula,...

Ekonomie bloei lánkal

1 dag gelede | Plaaslik

Jo-Maré Duddy – Ekonomiese groei het reeds in 2015 skerp begin tuimel sonder dat dit deur amptelike syfers weerspieël is, toon nuwe data wat gister...

NOU AAN DIE GANG

1 dag gelede | Byvoegsels

» Die Swakopmund Wetenskaplike Vereniging bied tans ‘n Kersfees-skattejag by die Swakopmund Museum aan. Dit bestaan uit twee afdelings, een vir kinders en een vir...

Geskorste raadslede van Rehoboth herkies

1 dag gelede | Regering

Denver Kisting op Rehoboth – Dieselfde span raadslede wat verlede jaar deur dr. Peya Mushelenga, die minister van stedelike en landelike ontwikkeling, in die pad...

Weer vir 13 Desember 2019

1 dag gelede | Weer

BINNELAND: Mooi weer en baie tot bloedig warm in die Suide. Elders sal dit gedeeltelik bewolk en baie tot bloedig warm wees. Winderige weer sal...

STEMFEITE: NAM & SA 2019

1 dag gelede | Politiek

In Namibië het Swapo persentasiegewys meer steun ingeboet as die ANC in Suid-Afrika.

NamibRe: Versekeraars moet 12,5% sedeer

1 dag gelede | Howe

Elvira Hattingh Plaaslike versekeringsmaatskappye móét voorts vir herverseke­ring by NamibRe opdok - tot tyd en wyl daar in 'n hangende hofsaak oor die wettigheid van...

CoW baklei teen beslaglegging

1 dag gelede | Regering

Denver Kisting – Die Windhoekse munisipaliteit (CoW) baklei tans verbete teen ’n beweerde beslagleggingsbevel wat poog om van hul vaste bates te konfiskeer.Veertien superintendente verbonde...