‘Bedanking is nie berou’

Hof kasty Mariental se liefling opnuut

01 August 2019 | Howe
Denver Kisting – Op die kop 10:48 gister het Katrina Hanse-Himarwa met kopdoek punt-in-die-lug in die beskuldigdebank haar lot gehoor.

Vir ’n totaal van nagenoeg 43 minute het sy sittend na regter Christie Liebenberg geluister terwyl hy uit sy 20 bladsy lange vonnisoplegging voorgelees het.

Hoewel talle mense – veral in die sosiale media – dié liefling van Mariental oor haar oënskynlik windmakerige gedrag voor en ná hofverrigtinge geroskam het, meen ’n kenner die impak van veral ’n hoëprofielhofsaak gaan sit nie in ’n mens se klere nie.

‘Emosioneel vermoeiend’

Dr. Shaun Whittaker, ’n Windhoekse kliniese sielkundige, het by navraag aan Republikein gesê: “Dit moes emosioneel vermoeiend vir oudminister Katrina Hanse-Himarwa gewees het om op korrupsieklagte in die hof te verskyn.”

Vanweë die oudgoewerneur van die Hardapstreek se lang geskiedenis as ’n politieke leier in die land moes die regsproses emosioneel baie van haar geverg het, meen Whittaker.

“So, dit is nie so maklik om haar lyftaal by tye te peil nie. Sy kom dikwels vol selfvertroue voor en is ’n bedrewe openbare spreker.”

Volgens die kenner verteenwoordig Hanse-Himarwa se lyftaal waarskynlik ’n mengelmoes van emosies: tipiese selfvertroue, ’n borrelende geaardheid, moontlik ’n sin van minagting en waarskynlik een van angs.

“Dit is uiteraard nooit maklik om in ’n plek van hoë angs, soos ’n hof, te wees nie.”

Volgens hom is dit ook moontlik dat die 52-jarige Swapo-grootkop en LP in haar veilige ruimtes anders opgetree het as dít wat in die openbare domein geblyk het.

Staat bestudeer vonnis

Intussen het mnr. Salomon Kanyemba, die staatsaanklaer, gister gesê die staat sal die vonnis bestudeer voor hy besluit om daarteen appèl aan te teken al dan nie.

Kanyemba het vir adjunk-aanklaer-generaal Ed Marondedze bygestaan tydens die verhoor.

Aanduidinge was reeds vroeër dat mnr. Sisa Namandje namens Hanse-Himarwa teen die skuldigbevinding van 8 Julie sou appelleer.

Namandje se N$1,4m-faktuur het ook gister in die vonnisoplegging ter sprake gekom.

Regter Liebenberg het nie vir Marondedze gelyk gegee dat tronkstraf ’n gepaste vonnis is nie.

Hy het gelas sy moet ’n boete van N$50 000 opdok. Sou sy dit nie kon betaal nie, sou twee jaar gevangenisstraf wel haar voorland gewees het.

Aanvullend is sy vir een jaar tronk toe gestuur. Dié been van die vonnis is in sy geheel opgeskort vir vyf jaar mits Hanse-Himarwa in daardie tydperk nie aan ’n soortelyke oortreding skuldig bevind word nie.

Omdat Hanse-Himarwa nog in die parlement dien en in ’n stadium dalk weer kan skeeftrap, het regter Liebenberg gemeen ’n opgeskorte vonnis sal haar genoegsaam in haar pasoppens laat bly.

Onseker oor diep sakke

Regter Liebenberg het egter gesê die hof koop nie haar weergawe dat sy finansieel noustrop trek nie – veral in die lig van ’n berig van Republikein se susterskoerant Namibian Sun waarin sy te kenne gee haar sakke is diep.

Hanse-Himarwa se regspan het nie die berig weerlê nie, het die regter gesê. Trouens, sy was die enigste wat daarop lig sou kon werp, het die regter gesê.

Boonop het die hof met Marondedze saamgestem dat sy waarskynlik nie oop kaarte gespeel het oor hoe welgesteld sy werklik is nie.

Eweneens, het Liebenberg gesê, Hanse-Himarwa het nie ter strafversagting getuig oor haar beweerde berou oor haar dade van Desember 2014 nie.

Haar bedanking op 9 Julie – ’n dag ná haar skuldigbevinding – kan nie as ’n teken van berou beskou word nie, het die regter gesê.

Teen 10:30 het Hanse-Himarwa haar tot ’n slukkie water gewend oomblikke voor Liebenberg gesê het haar gedrag het daartoe gelei dat die samelewing nie net in haar, maar ook in die regering vertroue verloor het.

Dit het sy reggekry deur die regering se pogings om ’n dak oor die kop van armes te help sit, in omstredenheid te dompel, lui die vonnisoplegging.

Tog het hy gemeen sy verdien ’n tweede kans. Op 52 is dié haar eerste skuldigbevinding en sy het oor drie dekades ’n produktiewe bydrae tot die samelewing gelewer, het die hof gemeen.

Boonop het sy geen geld verduister nie en ook nie self by haar misdaad gebaat nie.

Hanse-Himarwa se onlangse skuldigbevinding en vonnis kom nadat sy in die somer van 2014 beveel het ’n lys van begunstigdes onder die massabehuisingkema moet verander word sodat minstens een van haar familielede op Mariental daarby kon baat.

Sy was toe die goewerneur van die Hardapstreek.

[email protected]

Soortgelyk

 

Boete van N$100 000 vir ivoorsmokkelaar

10 ure gelede | Misdaad

'n Mosambiekse ivoorsmokkelaar, Bangorogile Motsokwe, is verlede Woensdag tot 'n boete van N$100 000 of tronkstraf van vier jaar gevonnis. Hy is skuldig bevind aan...

Britte se stem vandag is maak of breek vir...

12 ure gelede | Internasionaal

Die algemene verkiesing vandag in Brittanje baan die weg vir Brexit om deurgevoer te word. Dít is as Boris Johnson, premier en leier van die...

Shack Dwellers, NHAG to build houses at Rupara

23 ure gelede | Infrastruktuur

RUNDU – The Shack Dwellers Federation of Namibia and the Namibia Housing Action Group (NHAG) are going to construct 32 houses at Rupara settlement in...

Ministerie skors dokter ná skokkende bevalling

23 ure gelede | Plaaslik

Henriette Lamprecht Die dokter wat aan diens was tydens 'n normale bevalling in die Windhoek Sentrale ­Hospitaal toe 'n babadogtertjie onthoof is, is met onmiddellike...

Water-erosie dalk oorsaak van grondskeur

23 ure gelede | Plaaslik

Elvira HattinghDie skeur in die grond van sowat 20 km lank wat oos van Waterberg ná goeie reënneerslae verskyn het, is waarskynlik deur water-erosie veroorsaak....

Weer vir 12 Desember 2019

23 ure gelede | Weer

BINNELAND: Mooi weer en baie warm in die Suide. Elders sal dit gedeeltelik bewolk en baie warm tot bloedig warm wees.KUS: Gedeeltelik bewolk en...

Vyf damme nie meer dolleeg

23 ure gelede | Omgewing

Elvira Hattingh Vyf damme wat dolleeg was, het ná goeie neerslae verlede week water gekry. Dit beteken altesaam is daar nou 2,654 miljoen kubieke meter...

STEMFEITE: NOORDE EN NOORD-OOSTE

23 ure gelede | Politiek

Die infografiek wys in hoeveel van sy tradisionele vestings die regerende party 80%, 90% of meer van alle stemme verower het.

Moratorium op uitvoer van hout opgehef

23 ure gelede | Omgewing

Ronelle Rademeyer - Nagenoeg 100 000 stukke hout van bome wat wettig op plase in die twee Kavangostreke en Zambezi afgekap en opgesaag is, mag...