Balie ontstoke oor aanval op regbank

'Regsprosesse in gedrang'

06 March 2018 | Howe
Denver Kisting - Die genootskap van ­advokate het hom op president Hage Geingob beroep om die Grondwet te beskerm en om die regering amptelik van die adjunk-waardeerder-generaal, mnr. Protasius Thomas, se onverantwoordelike uitlatings te laat afstand doen.

Die genootskap het skerp te velde getrek teen wat hulle noem 'n ongeoorloofde aanval op die ­integriteit van 'n regter.

Dít kom nadat Thomas verlede week adjunk-regter-president Hosea Angula van partydigheid beskuldig het.

Die vereniging sê by monde van sy visepresident, ­advokaat Gerson Narib: “Hoewel reg­ver­dige kritiek van 'n hofuitspraak toelaatbaar is, is 'n ­ongeregverdigde aanval op die integriteit van 'n regter nie.”

Volgens Narib sien hulle dié “skandalige aanval deur die adjunk-­waardeerder-generaal op die integriteit van die adjunk-­regter-president in 'n baie ­ernstige lig”.

“Dit is nie net 'n skending van die grondwetlike gewaarborgde onafhanklikheid van die regbank nie, maar 'n poging deur 'n senior regeringsamptenaar om die ­onafhanklikheid van die regbank te ondermyn,” sê hy.

'n Hofuitspraak wat die betaling van grondbelasting ten bedrae van nagenoeg N$80 miljoen uitstel, plaas ­grondhervorming op die spel. Só het Thomas verlede week aangevoer.

In die eerste plek, het Thomas uitgevaar, moes adjunk-regter-president Angula nie op die bank gewees het nie.

Thomas beweer die regter was nie onpartydig nie en moes homself verskoon het.

Daarnaas bring voorverlede week se uitspraak in die hoërhof in Windhoek 'n aantal regs­prosesse in die gedrang, sê hy.

Sonder 'n belastingklaring­sertifikaat kan die regering geen plaas vir hervestiging koop nie.

Boonop kan 'n boedel, wat kommersiële landbougrond insluit, nie afgehandel word nie, maan Thomas. Daar kan selfs nie om finansiering van grond aansoek gedoen word sonder sodanige ­dokument nie, het hy gesê.

“As daar nie spoedig opgetree word nie, sal daar geen mark vir grond wees nie. Die mark is ­verwring.”

Angula het voorverlede week gelas grondbelasting mag nie gehef word weens die ­vermeende onregmatighede van en onge­rymdhede met die ­berekening van grondwaardes, en die ­redelike veronderstelling dat boere daardeur skade sal ly nie.

Hy het 'n interdik uitgereik teen enige aanslag van grondbelasting op kommersiële landbougrond wat ingevolge die omstrede voorlopige hoofwaardasierol van 1 April 2012 betaalbaar is.

Dit is hangende hersienings­prosedures oor besware wat verlede jaar in die waardasiehof aangeteken is.

Soortgelyk

 

ACC soek vir Rooies

9 ure gelede | Misdaad

Denver Kisting - Die Teenkorrupsiekommissie (ACC) het Maandagmiddag ’n verklaring uitgereik waarin hy die publiek vra om te help om die oudlanddros, mnr. Rooies Mostert,...

Ma, seun van Reho in hof ná tref-en-trap

14 ure gelede | Howe

Denver Kisting – ’n 45-jarige ma van Rehoboth verskyn na verwagting vandag saam met haar tienerseun in die landdroshof op dié dorp.Dít kom nadat die...

Hondelewe vir stropers

1 dag gelede | Ministeries

Francoise Steynberg op Waterberg - Pas ná die ministerie van die omgewing en toerisme met die opleiding van hul honde-eenheid teen stropery begin het, het...

NBC verdrink in skuld

1 dag gelede | Tegnologie

Augetto GraigDie voortslepende arbeidsgeskil by die nasionale uitsaaier (NBC) besorg mnr. Stanley Simataa, minister van inligting en kommunikasietegnologie, hoofbrekens, het hy gesê. “Die NBC verdrink...

PDM beraadslag oor grond

1 dag gelede | Politiek

Augetto Graig - Die nasionale uitvoerende komitee van die amptelike opposisieparty, die Popular Democratic Movement (PDM), het Vrydagaand in voorbereiding op die komende nasionale grondkonferensie...

Weer vir 14 September 2018

1 dag gelede | Weer

BINNELAND: Meestal sonnig en baie warm. KUS: Gedeeltelik bewolk en koud tot matig met miskolle in die oggend op plekke. GETYE BY...

Noodvoedselbank vir hospitale sonder kos

1 dag gelede | Gesondheid

Henriette Lamprecht – ‘n Noodvoedselbank is in die Erongostreek geskep as ‘n tydelike oplossing vir die voedseltekorte wat tans in alle staatshospitale in die streek...

Hoop vir die wilde perde

1 dag gelede | Omgewing

Die wilde perde by Garub in die Suide is ’n vulletjie ryker. Volgens ’n verklaring van die Namibië Wildeperdestigting is die vulletjie se trotse ouers...

Namibiërs trotseer Bolivia se pieke

1 dag gelede | Mense

Elvira Hattingh - Twee kleinneefs, mnre. Gerhard Jacobs en Harmen Potgieter, het onlangs uit Bolivia teruggekeer nadat hulle van die eerste Namibiërs geword het om...