Avid-beskuldigdes smeek om genade

Josea het berou

13 June 2018 | Howe
Catherine Sasman



Die staatsaanklaer mnr. Ed Marondedze sê die hof moet nie die beskuldigdes in die Avid-bedrogsaak se rol en status in die samelewing onderskat nie.

In dié saak het N$30 miljoen se openbare fondse verdwyn.

“Wie is hierdie mense? Wat was hul rolle in die gemeenskap? Wat het die samelewing van hulle verwag?” het Marondedze gister gedurende die voorvonnisverhoor in die hoërhof gevra.

Marondedze het gesê vier beskuldigdes – die voormalige parlementslede mnre. Paulus Kapia en Ralph Blaauw, die rekenmeester me. Ines /Gânes, en die prokureur me. Sharon Blaauw – was nasionale leiers wat verantwoordelik was vir en besorg moes wees oor hoe openbare fondse aangewend word.

“Ons het hier te doen met hierdie mense. Hulle het na die ­Maatskaplike Voorsorgkommissie (SSC) gegaan op grond van idees, dummies wat (Lazarus) Kandara en (Nico) Josea aan hulle verkoop het,” het Marondedze gesê.

Hy het gesê teen die tyd wat die Avid-sage oopgebars het, het Kapia “'n briljante loopbaan” gehad en was hy as politikus tot op die vlak van 'n adjunkminister bevorder.

“Baie is van hom verwag. Hy was veronderstel om 'n voorbeeld te stel,” het Marondedze aangevoer.

Hy het gesê Kapia en Ralph Blaauw het as LP's “letterlik die land bestuur”.

In plaas daarvan is die leiers en vooraanstaande mense “in 'n verneukspul gebruik” wat deur Kandara en Josea “bedink is”, het Marondedze gesê.

Hy het aangevoer die beskuldigdes toon nie berou nie en dit is nie genoeg om “op die laaste nipper om vergifnis te pleit nie”.

Kapia, Ralph Blaauw en /Gânes is skuldig bevind op 'n klag van bedrog.

Sharon Blaauw en Josea is skuldig bevind aan roekelose en bedrieglike handel.

Josea is ook skuldig bevind op 'n klag van diefstal deur die omskakeling van fondse vir sy eie gebruik.



'EK IS OPREG JAMMER'

Josea het in trane uitgebars toe hy sy pleidooi vir 'n versagtende vonnis voor regter Christie Liebenberg lewer.

“Dit is nie maklik nie. Ek is emosio­neel, geestelik en fisiek ­afgetakel. Ek bevind myself in baie moeilike omstandighede. As ek dink aan my gesin wat elke dag sonder 'n pa moet wees, is dit net 'n gebedsaak. 'n Huis sonder 'n vader is nie 'n huis nie. Die kinders word sonder 'n pa groot. Dit is 'n gebroke huis. Daar is geen basis, leiding of teregstelling nie. Ek is jammer oor wat gebeur het. Ek is opreg jammer,” het Josea gesê.

Hy het gesê sy drie seuns – van 32, 29 en 19 – is emosioneel gekneus en benadeel in die 13 jaar wat die saak geduur het. Hy sê sy oudste, 'n vlieë­nier, kan nie 'n werk kry nie omdat hy Josea se kind is. Die tweede seun, 'n vryskut-bestuurder, het in matriek swak gevaar en die jongste moet nou deur Namcol probeer om sy punte vir matriek te verbeter.

Josea sê hy het in 2015 sy laaste salaris van N$120 000 vir stukwerk verdien ná hy gelikwideer is.

Al wat hy nog besit, is 10 tot 15 bokke wat ongeveer N$20 000 werd is, en 'n huis wat sy swaer namens hom aan die bank afbetaal.

Hy sê hy is onlangs met hoë bloeddruk gediagnoseer en moet nou daagliks 10 pille neem om te bly leef.

Hy het ook drie weke gelede 'n ­operasie aan sy neus gekry.

“Ek het nie geweet dit sou so uitdraai nie, maar vandag laat ek alles in u hande oor, want u weet die beste,” het Josea gesê oor sy lot wat aan ­Liebenberg oorgelaat is.



DIE BLAAUWS

Sharon en Ralph Blaauw se regsverteenwoordiger, mnr. Gilroy Kasper, het namens sy kliënte vir 'n ­opgeskorte vonnis of “in die ergste geval” gevangenisstraf met die keuse van 'n boete gevra.

Hy het 'n boete van N$20 000 elk voorgestel.

“Die beskuldigdes is geviktimiseer en verontmenslik. Hulle is deur die ­algemene publiek gebrandmerk as die diewe wat verantwoordelik is vir die verlies van die SSC-geld. Tot vandag is daar nog diegene wat glo dat hulle steeds groot somme geld wegsteek,” het Kasper gesê.

Hy het gesê die twee het “nie 'n sent” van die SSC-geld ontvang nie, en het nie geskroom om hul volle samewerking aan die polisie gedurende die ­ondersoek na die vermiste N$30 miljoen te gee nie.

Kasper het gesê die Blaauw-egpaar het twee kinders – van 20 en 22 - wat tans op universiteit is, wat verdere ­finansiële en emosionele druk op die gesin plaas en die kinders moontlik hul studies kan kos.

Soortgelyk

 

Windhoek se baas in die pad gesteek

1 uur gelede | Plaaslik

Denver Kisting – Windhoek se uitvoerende hoof, mnr. Robert Kahimise, is geskors.Republikein verneem dié skorsing sal vir minstens drie maande geld.Die wending kom te midde...

Swaar reën, oosweer kom dalk môre

3 ure gelede | Omgewing

Swaar reën word vir môre op plekke oor die sentrale noorde, die Kunene-, Erongo-, westelike Otjozondjupa- en Khomasstreek voorspel, terwyl oosweer na verwagting vanaf môre...

'Barbaarse' olifantjag skaad Namibië se beeld

16 ure gelede | Plaaslik

Denver Kisting Namibië is opnuut internasio­naal in die sop nadat 'n video oor 'n wrede olifantjag die ­afgelope week aan die lig gekom het.'n Storm...

Elite hervestig, sê ontevrede aansoekers

16 ure gelede | Plaaslik

Catherine Sasman - Redes vir die ministerie van grondhervorming se besluit om die plase Felseneck (nr. 26) en Okanatjikuma (nr. 26) aan die beslote korporasie...

Utoni hou voet by stuk oor Rus

16 ure gelede | Plaaslik

Ronelle Rademeyer Die minister van grondhervor­ming, mnr. Utoni Nujoma, het Vrydagmiddag aan joernaliste herhaal wat hy die vorige middag aan parlementariërs gesê het, naamlik dat...

Huurbeheer binne drie weke ingestel

16 ure gelede | Plaaslik

Augetto Graig - Die Regstellende Herposisioneringsbeweging (AR) sê hy het daarin geslaag om die regering tot die instel van huurbeheerrade te dwing.In huurordonnansie nommer 13...

Skole, koshuise is ‘kraamsale’

16 ure gelede | Onderwys

Henriette Lamprecht – Die enigste oplossing vir die terugbrenging van morele waardes en om tienerswangerskappe hok te slaan, is die herinstel van Bybelstudie by skole...

Streeksowerhede nou verantwoordelik vir waterverskaffing, sanitasie

16 ure gelede | Ministeries

Die ministerie van landbou, water en bosbou se waterverskaffing- en sanitasiekoördinasie-funksie sal voorts op streeksvlak hanteer word. Die funksies onder meer die identifisering van plekke...

Simataa bekommerd oor kubermisdaad

16 ure gelede | Ministeries

Denver Kisting – Die minister van inligting en kommunikasietegnologie, mnr. Stanley Simataa, sê die prys van tegnologie is aanlyn misdaad.Hy het verlede week in die...