Amerikaanse kongres kom ooreen oor veiligheid
Die Demokrate het Sondag een van hul eise laat vaar sodat daar verby die dooie punt gekom kan word.
Die Amerikaanse kongres het Maandag ’n voorlopige ooreenkoms oor grensbeveiliging bereik in ’n poging om te keer dat die regering Saterdag weer gedeeltelik sluit – maar steeds sonder die US$5,7 miljard wat pres. Donald Trump vir sy grensmuur wou hê.
“Ons het in beginsel ’n ooreenkoms oor die finansiering van veiligheidsprogramme tot 30 September bereik,” het die Republikeinse senator Richard Shelby aan verslaggewers gesê.
“Ons personeel werk naarstig om die besonderhede uit te werk,” het hy gesê. Nie hy of drie ander senior kongreslede saam met hom het enige besonderhede van dié ooreenkoms gegee nie.
Dit is egter glad nie seker of Trump die ooreenkoms sal aanvaar nie. Sy eis vir US$5,7 miljard in Desember om ’n grensmuur tussen Amerika en Mexiko te bou, het daartoe gelei dat die federale regering vir ’n ongeëwenaarde 35 dae gedeeltelik gesluit was.
Die sluiting is in Januarie vir drie weke lank opgehef sonder dat Trump sy sin gekry het.
’n Kongres-assistent, wat anoniem wil bly, sê die ooreenkoms sluit in US$1,37 miljard om ’n nuwe heining op die suidelike grens aan te bring. Dit is naastenby dieselfde bedrag as wat verlede jaar toegeken is.
Die assistent het gesê dié geld is nie vir ’n muur nie.
Trump was Maandagaand in die grensstad El Paso in Texas om steun vir sy muur te werf.
Net voordat hy op die verhoog is, het Trump gesê hy het gehoor daar is vordering in die onderhandelings. Hy het egter nie die besonderhede bespreek nie.
“Maar julle moet weet, ons gaan in elk geval die muur bou. Miskien is vordering gemaak, miskien nie.”
DOOIE PUNT
Die Demokrate het Sondag een van hul eise laat vaar sodat daar verby die dooie punt gekom kan word. Hulle het Vrydag nog daarop aangedring dat ’n beperking geplaas word op die aantal beddens wat in immigrasie-aanhoudingsentrums is, maar dit is Sondag van die tafel gehaal.
Die Demokrate meen die Trump-administrasie gebruik die aanhoudingsentrums om onwettige immigrante vinniger te deporteer, terwyl van hulle probeer om om asiel aansoek te doen.
Die Demokraat Nita Lowey sê sy hoop hulle het teen Woensdag ’n finale ooreenkoms.
Nancy Pelosi, speaker van die huis van verteenwoordigers, het aan Lowey gesê “sy glo sy het die regte besluit geneem” (om die eis oor die beddens te laat vaar).
Pelosi en Trump was weke lank in die nuus oor hul dispuut oor die grensmuur en die sluiting van die regering.
Sy wou hê hy moet sy staatsrede kanselleer omdat die regering gesluit was. Hy het gesê sy kan hom net keer deur hom te verbied om na die huis van verteenwoordigers te gaan. Sy het nie op haar laat wag nie.
Hierop het Trump sy staatsrede uitgestel en ’n paar dae later het hy die regering heropen.
Pelosi het daarna vir Trump genooi om sy staatsrede te lewer, maar het op hierdie geleentheid opslae gemaak toe sy opstaan en vir hom hande klap.
Die internet was verdeeld oor Pelosi se handeklappery, wat sommige as “sarkasties” en ander as “fantasties” beskou het.
Pelosi het ontken dat sy sarkasties was. – Netwerk24/Reuters
“Ons het in beginsel ’n ooreenkoms oor die finansiering van veiligheidsprogramme tot 30 September bereik,” het die Republikeinse senator Richard Shelby aan verslaggewers gesê.
“Ons personeel werk naarstig om die besonderhede uit te werk,” het hy gesê. Nie hy of drie ander senior kongreslede saam met hom het enige besonderhede van dié ooreenkoms gegee nie.
Dit is egter glad nie seker of Trump die ooreenkoms sal aanvaar nie. Sy eis vir US$5,7 miljard in Desember om ’n grensmuur tussen Amerika en Mexiko te bou, het daartoe gelei dat die federale regering vir ’n ongeëwenaarde 35 dae gedeeltelik gesluit was.
Die sluiting is in Januarie vir drie weke lank opgehef sonder dat Trump sy sin gekry het.
’n Kongres-assistent, wat anoniem wil bly, sê die ooreenkoms sluit in US$1,37 miljard om ’n nuwe heining op die suidelike grens aan te bring. Dit is naastenby dieselfde bedrag as wat verlede jaar toegeken is.
Die assistent het gesê dié geld is nie vir ’n muur nie.
Trump was Maandagaand in die grensstad El Paso in Texas om steun vir sy muur te werf.
Net voordat hy op die verhoog is, het Trump gesê hy het gehoor daar is vordering in die onderhandelings. Hy het egter nie die besonderhede bespreek nie.
“Maar julle moet weet, ons gaan in elk geval die muur bou. Miskien is vordering gemaak, miskien nie.”
DOOIE PUNT
Die Demokrate het Sondag een van hul eise laat vaar sodat daar verby die dooie punt gekom kan word. Hulle het Vrydag nog daarop aangedring dat ’n beperking geplaas word op die aantal beddens wat in immigrasie-aanhoudingsentrums is, maar dit is Sondag van die tafel gehaal.
Die Demokrate meen die Trump-administrasie gebruik die aanhoudingsentrums om onwettige immigrante vinniger te deporteer, terwyl van hulle probeer om om asiel aansoek te doen.
Die Demokraat Nita Lowey sê sy hoop hulle het teen Woensdag ’n finale ooreenkoms.
Nancy Pelosi, speaker van die huis van verteenwoordigers, het aan Lowey gesê “sy glo sy het die regte besluit geneem” (om die eis oor die beddens te laat vaar).
Pelosi en Trump was weke lank in die nuus oor hul dispuut oor die grensmuur en die sluiting van die regering.
Sy wou hê hy moet sy staatsrede kanselleer omdat die regering gesluit was. Hy het gesê sy kan hom net keer deur hom te verbied om na die huis van verteenwoordigers te gaan. Sy het nie op haar laat wag nie.
Hierop het Trump sy staatsrede uitgestel en ’n paar dae later het hy die regering heropen.
Pelosi het daarna vir Trump genooi om sy staatsrede te lewer, maar het op hierdie geleentheid opslae gemaak toe sy opstaan en vir hom hande klap.
Die internet was verdeeld oor Pelosi se handeklappery, wat sommige as “sarkasties” en ander as “fantasties” beskou het.
Pelosi het ontken dat sy sarkasties was. – Netwerk24/Reuters
Kommentaar
Republikein
Geen kommentaar is op hierdie artikel gelaat nie