African Stars blaas die aftog in Marokko
Die klub se fokus verskuif nou om sy agterstand op die NPL-puntelys te begin inhaal.
African Stars se aanslag op die 2018-'19 Konfederasie van Afrika-sokker (CAF) se Konfederasiebeker is daarmee heen nadat die Windhoekers Sondagaand met 1-0 in die tweede en laaste kwalifiserende wedstryd teen Raja Casablanca die knie moes buig.
Stars het 'n week tevore die strydlustige Marokkane by die Sam Nujoma-stadion in Katutura tot een doel elk beperk. Sondagaand moes hulle egter aanskou hoe die gasheerspan in die 56ste minuut die doelnet tref om 'n aggregaattelling van 2-1 te beklink en sy plek in die top-16 van die reeks in te neem.
Hoewel Stars in beide botsings briljant op die verdediging was, was dit duidelik dat die Samba Boys nie oor die nodige skietgoed of vaardighede beskik om doele teen Raja in Casablanca aan te teken nie. Stars het wel die wedstryd soos 'n stormloop afgeskop, maar kon met die meeste besit in die eerste klompie minute nie die verdedigende kampioen se doelkas bedreig nie.
Dieselfde gebrek aan finesse het Stars ook teen Orlando Pirates van Suid-Afrika aan die kaak gestel.
Ná Stars se vrugtelose aanslae vroeg in die kragmeting, het Raja sy voete gevind en die besoekers met een aanslag ná die ander getoets. Stars het met trots en eer uit die stryd getree om rustyd met die telling op 0-0 te gaan planne beraam.
Raja begin die tweede helfte goed en sy kaptein slaag daarin om binne elf minute vanaf 'n vryskop die wendoel te behaal. Vir Stars wat gereken die doel is vanuit 'n onkant posisie behaal, was dit egter nie beskore om die skeidsregter van hul vermoede te oortuig nie.
Al wat die geliefde Starlile van Katutura kon doen, was om verwoed aan te val, maar hul vaardighede laat hulle opnuut voor die doelkas in die steek. Indien Stars 'n gelykopuitslag kon afdwing, sou hulle straks 'n goeie wenkans in 'n strafskopstryd kon hê.
In die paar bykomende minute speeltyd het Ratanda Mbazuvara, Stars se doelwagter, 'n geelkaart vir sy relletjie met een van Raja se aanvallers gekry wat 'n doelskop wou waag nadat die skeidsregter reeds sy fluitjie vir onkantspel geblaas het.
Sekondes later is dit boonop die verdediger Treasure Kauapirura wat saam met 'n speler van Raja die gewraakte rooikaart ontvang en verplig is om die veld in die doodsnikke van die wedstryd te verlaat.
NPL-AANSLAG
Stars is die verdedigende Namibiese Premierliga-kampioen vir 2017-'18. Met sy verpligtinge in die Konfederasiebeker iets van die verlede kan hy vanaf komende Saterdag sy volle aandag op die 2018-'19 NPL toespits wanneer hy Young Brazilians in die verre Karasburg gaan pak.
Met Stars se kraakvars ondervinding van topklas kontinentale klubsokker teen Pirates en Raja Casablanca, kan die ander NPL-spanne maar solank bontstaan met die Samba Boys wat baie het om te bewys. Stars het tot dusver net vier NPL-wedstryde gespeel en gaan 'n besige tyd op die veld hê om FNB Black Africa te probeer inhaal wat tans die voorloper op die punteleer is. - Nampa
Stars het 'n week tevore die strydlustige Marokkane by die Sam Nujoma-stadion in Katutura tot een doel elk beperk. Sondagaand moes hulle egter aanskou hoe die gasheerspan in die 56ste minuut die doelnet tref om 'n aggregaattelling van 2-1 te beklink en sy plek in die top-16 van die reeks in te neem.
Hoewel Stars in beide botsings briljant op die verdediging was, was dit duidelik dat die Samba Boys nie oor die nodige skietgoed of vaardighede beskik om doele teen Raja in Casablanca aan te teken nie. Stars het wel die wedstryd soos 'n stormloop afgeskop, maar kon met die meeste besit in die eerste klompie minute nie die verdedigende kampioen se doelkas bedreig nie.
Dieselfde gebrek aan finesse het Stars ook teen Orlando Pirates van Suid-Afrika aan die kaak gestel.
Ná Stars se vrugtelose aanslae vroeg in die kragmeting, het Raja sy voete gevind en die besoekers met een aanslag ná die ander getoets. Stars het met trots en eer uit die stryd getree om rustyd met die telling op 0-0 te gaan planne beraam.
Raja begin die tweede helfte goed en sy kaptein slaag daarin om binne elf minute vanaf 'n vryskop die wendoel te behaal. Vir Stars wat gereken die doel is vanuit 'n onkant posisie behaal, was dit egter nie beskore om die skeidsregter van hul vermoede te oortuig nie.
Al wat die geliefde Starlile van Katutura kon doen, was om verwoed aan te val, maar hul vaardighede laat hulle opnuut voor die doelkas in die steek. Indien Stars 'n gelykopuitslag kon afdwing, sou hulle straks 'n goeie wenkans in 'n strafskopstryd kon hê.
In die paar bykomende minute speeltyd het Ratanda Mbazuvara, Stars se doelwagter, 'n geelkaart vir sy relletjie met een van Raja se aanvallers gekry wat 'n doelskop wou waag nadat die skeidsregter reeds sy fluitjie vir onkantspel geblaas het.
Sekondes later is dit boonop die verdediger Treasure Kauapirura wat saam met 'n speler van Raja die gewraakte rooikaart ontvang en verplig is om die veld in die doodsnikke van die wedstryd te verlaat.
NPL-AANSLAG
Stars is die verdedigende Namibiese Premierliga-kampioen vir 2017-'18. Met sy verpligtinge in die Konfederasiebeker iets van die verlede kan hy vanaf komende Saterdag sy volle aandag op die 2018-'19 NPL toespits wanneer hy Young Brazilians in die verre Karasburg gaan pak.
Met Stars se kraakvars ondervinding van topklas kontinentale klubsokker teen Pirates en Raja Casablanca, kan die ander NPL-spanne maar solank bontstaan met die Samba Boys wat baie het om te bewys. Stars het tot dusver net vier NPL-wedstryde gespeel en gaan 'n besige tyd op die veld hê om FNB Black Africa te probeer inhaal wat tans die voorloper op die punteleer is. - Nampa
Kommentaar
Republikein
Geen kommentaar is op hierdie artikel gelaat nie