Affies kry ná rustyd oorhand teen Elnatan

Skolerugby

10 June 2019 | Sport
Tielman van Lill - Pupkewitz Haval Elnatan se eerste rugbyspan van Stampriet het Saterdagoggend 'n draai by Affiespark gemaak waar die huidige titelhouer, KMC/JCC Windhoek Afrikaanse Privaatskool, die gasheer in die Momentum o.19-premierliga was.

Drie-en-dertig punte sonder antwoord in die tweede helfte het die gasheerspan in staat gestel om die botsing met 40-12 in te palm.

Elnatan wat vroeg in die botsing eerste sy rekening met 'n vyfpunter geopen het, het 'n opwindende eerste helfte met 'n voorsprong van 12-7 afgesluit.

Vir Elnatan het haker DP de Jager en vleuel Hugo Truter agter die doellyn gaan kuier, terwyl binnesenter Corné Esterhuyse twee punte met sy stewel bygevoeg het. Esterhuyse mis egter in die openingsminute met 'n strafskop, asook met sy eerste doelskop.

Vir Affies antwoord die stut Ernst Lowe ná 'n stormramlopie met 'n puik drie en losskakel Jeandré Loubser slaag met sy eerste van vyf doelskoppe om sewe punte op die besoekers in te haal.

Ná rustyd is dit egter 'n ander Affiesspan wat op die veld draf om binne die eerste minuut te gaan druk en ses minute later weer so te maak.

Met die momentum in die guns van die plaaslike span vind sy snellers hul ritme en maak skoonskip in die tweede helfte met 33 punte teen nul.

Elnatan se manne het nooit gaan lê nie en het telkens tot in Affies se kwartgebied gevorder. Die besoekers het met ses strafskoppe binne trefafstand verkies om kantlyn toe te mik. Maar hul lynstane en hanteerwerk het gelol en geen van dié geleenthede het 'n drie opgelewer nie.

Indien hulle 'n paar maal na die pale aangelê het, kon Elnatan se momentum en eindtelling anders gelyk het.

Elnatan was een slag doodseker dat hulle 'n drie gedruk het nadat Affies die bal kort voor die doellyn verloor het. Die skeidsregter beslis egter dat Elnatan die bal aangeslaan het en ken nie die drie toe nie.

In die laaste minuut van die skoon, aanskoulike wedstryd teken Affies sy laaste drie onder die pale aan wat vir 'n welverdiende sege verdoel word.

Vir Affies gaan druk Ernst Lowe, Marius Wessels, kaptein Bernhardt Wessels, Jaco Kotze, Kobus Wilders en Jonathan Hanekom. Jeandré Loubser slaag met vyf doelskoppe.



GIM STUIT PRO-ED IN SPORE

Die Swakopmunders PSG Pro-Ed Akademie het hul seisoen met oorwinnings teen Elnatan en OK Foods Moria afgeskop, maar het Saterdag tweedebeste afgekom, skryf Andrew Poolman.

Die Windhoek Gimnasium Leeus, geborg deur die Schoemans-groep, was op hul tuiswerf met 53-3 aan die wenkant nadat hulle rustyd met 24-3 in beheer van sake was.

Agter die sterker agttal is Gimnasium se losskakel Cornez Liebenberg 'n generaal wat hulle op die voorvoet hou, óf na willekeur akkurate lang aangeë na sy buitespelers uitskiet om die gapings met vaart aan te val. Liebenberg se bydrae was hierdie keer net 'n beskeie vier doelskoppe, maar dit ly geen twyfel watter sleutelrol hy in die rooies se patroon speel nie.

Vir die wenspan het sy vleuels Mell Theunissen en Lyle Beukes, senters Samuel Poulton en Kieron Diergaardt, skrumskakel Jahno du Plessis, slot en kaptein Michael Thuynsma, flank Ethan Rittmann en stut Ethan Thiart (2) die drieë gaan druk.

Pro-Ed se losskakel Godwin Silvanus het in die eerste helfte met een strafdoel geslaag, nadat hy vroeër met 'n makliker poging mis gekorrel het.



WHS WEN RILLER

Net 'n enkele punt het die spanne op Outjo geskei nadat Samsung Windhoek Hoërskool en OK Foods Moria beide desperaat na hul eerste ligasege vir die seisoen op soek was.

WHS het met 29-28 die knoop deurgehaak nadat dit rustyd ewe nael­skraap (22-21) in die Windhoekers se guns was.

Die ligbloues se driedrukkers was vleuels Patrick Karstens en Emil Weder, skrumskakel Tyrese de Wee en stut Daniel Opperman. Losskakel Geraldo Beukes het raak gekorrel met drie doelskoppe en 'n strafdoel.

WHS se afrigter Henry Kemp sê: “DJ Holtzhausen (losskakel van Moria) was weer bitter goed en het sy span op die voorvoet gehou. Vir WHS het haker JC Rossouw en stut Danie Opperman reusewerk gedoen om seker te maak ons span het suiwer balbesit.

“JC Rossouw se drie vyf minute voor die einde toe hy deur vier Moria-verdedigers gebars het om die drie naby genoeg aan die pale te gaan druk, was 'n bepalende oomblik om die doelskop die wenpunte te maak.”



TSUMEB BLY ONOORWONNE

Rubicon Tsumeb Gimnasium se seisoen staan op vier gespeel en vier gewen, met die maroen span wat ook te swaar vir De Duine was om te hanteer.

Tsumeb was met 53-7 oortuigend aan die wenkant teen die nuwelingspan in vanjaar se kompetisie, wat ondanks sy tuisvoordeel op Walvisbaai swaar geleef het.

Die wenspan se driedrukkers was haker Frikkie Engelbrecht, stutte Bernd Beddies (2) en Tinus van Wyk, slotte Pieter-Daan Kok (2) en IJ Grobbelaar, heelagter Lister Cochrane en vleuel Jandre Hayward.

Vier van losskakel Botma Keyser se doelskoppe het die kol getref.

“Ek haal my hoed af vir De Duine se toewyding om in die premierliga hul merk te probeer maak. In die eerste helfte het hulle hard probeer en het 'n opportunistiese drie gedruk (slot Aldrin Majiedt, verdoel deur losskakel Algirnon Kolz) toe ons 'n bal laat val het wat hulle kon deurskop om in die hoek te gaan druk,” sê Tsumeb se afrigter, Wouter Niehaus.

“Veral teen ons agttal het hulle nie genoeg skietgoed gehad nie. As skole-organiseerders het ons besluit dat die afrigters kan ooreenkom om 'n wed­stryd stop te sit sodra die punteverskil veertig is, wat ons omtrent 15 minute ná rustyd bereik het.

“De Duine het tot in daardie stadium steeds trots probeer om hul ding te doen en te keer en ondernemend te speel, maar hulle hele reserwebank was reeds op die veld. Ek glo die besluit is in hierdie geval op die regte tydstip geneem.

“As hulle kan volhou en hul diepte vergroot, kan hulle dalk later hul opponente vir 'n langer tyd besig hou.”

• Een wedstryd is vir komende Dinsdagmiddag om drieuur geskeduleer, naamlik Windhoek Gimnasium se besoek aan Elnatan se tuisdorp Stamp­riet.

Soortgelyk

 

Covid-19: 5de nuwe geval binne 4 dae

15 ure gelede | Gesondheid

‘n Vragmotorbestuurder in Walvisbaai het gister positief vir Covid-19 getoets.Dit is die vyfde positiewe geval sedert Woensdag. Al die persone was in kwarantyn.Persone waarmee die...

‘80% van skole gereed’

3 dae gelede | Onderwys

Henriette Lamprecht – Sowat 80% van die 1 920 staatskole oraloor in die land is gereed om leerlinge volgens verpligte gesondheidsregulasies te ontvang wanneer hulle...

Nog leerlingdokters wag om uitgeplaas te word

3 dae gelede | Gesondheid

Henriette Lamprecht – Meer as 100 leerlingdokters wag glo reeds maande om vir internskappe by staatshospitale oraloor in die land uitgeplaas word. Die 166 leerlingdokters...

Stadspolisie van hardhandigheid beskuldig

3 dae gelede | Misdaad

Denver Kisting – ’n Inwoner van Groot Aub, mnr. Richard Davids, voer aan ’n beampte van die stadspolisie, waarnemende sersant Erwen Katiti, het hom Dinsdaglaatmiddag...

Weer vir 22 Mei 2020

3 dae gelede | Weer

BINNELAND: Gedeeltleik bewolk en warm in die streke van ||Kharas en Hardap. Elders sal dit sonnig en warm tot baie warm wees.KUS: Gedeeltelik bewolk en...

‘Vervoer van drank nie ’n misdaad’

3 dae gelede | Misdaad

Francoise SteynbergDie blote vervoer van drank is nie ’n misdaad nie en kan nie as redelike gronde gebruik word vir agterdog van die koop of...

Vroue in kwarantyn toets positief vir Covid-19

3 dae gelede | Gesondheid

Henriette Lamprecht – Twee vroue het in kwarantyn positief vir Covid-19 getoets. Dit bring Namibië se totaal bevestigde Covid-19-gevalle op 18 te staan. Volgens die...

Ebikes: vinnig, goedkoop en groen

3 dae gelede | Mense

Tanja Bause Nie te veel besighede kan sê dat hulle in die Covid-19-tyd so goed aangepas het dat hulle nuwe werknemers moes aanstel nie. Ebikes4Africa...

Market Watch Covid page - snippets

3 dae gelede | Gesondheid

The Namibia Football Association (NFA) executive committee has yet to decide what to do with funds it expects to receive from the Federation of International...