28 jaar vir jong Reho-moordenaar

17 December 2018 | Howe
Denver Kisting



'n 22-jarige Rehoboth-inwoner is Vrydagoggend in die hoërhof in Windhoek vir 28 jaar tronk toe gestuur weens moord, verkragting en diefstal.

Regter Christie Liebenberg het vir Aldrin Goliath tronkstraf van 23 jaar opgelê weens die moord op 'n sestienjarige meisie, Camila Steyn.

Goliath het haar twee jaar gelede op dié Hardapdorp verwurg nadat hy haar verkrag en toe met haar selfoon en skoene op die vlug geslaan het.

Die jong man het tydens sy verhoor beweer hy en Steyn het aanvanklik seks met instemming gehad, waartydens sy glo gevra het hy moet ophou en hom toe begin aanval het.

Die hof het hom nie gelyk gegee nie.

Weens haar verkragting is Goliath 10 jaar gevangenisstraf opgelê.

Hy het vir die buit van haar selfoon en skoene drie jaar tronkstraf gekry.

Regter Liebenberg het gelas die helfte van die verkragtingvonnis en dié weens diefstal moet gesamentlik uitgedien word.

Die regter was van mening hoewel die erns van die oortredings 'n vonnis vereis wat as afskrikmiddel vir soortgelyke geweldenaars moet dien, 'n lewenslange vonnis nie geskik sou wees nie.

Dít kom nadat mnr. Marthino Olivier, namens die staat, aanbeveel het Goliath moet lewenslank boet.

Volgens regter Liebenberg het Goliath se jeug in sy guns getel en die feit dat die oortredings op die ingewing van die oomblik gepleeg is en nie vooraf beplan is nie.

Daar was ook geen bewyse dat Goliath inherent boos en gewelddadig is nie, het die uitspraak gelui.

“Hoewel die aanval op die oorledene wreed was, is daar niks wat uitsluit dat dit weens onvolwassenheid aan die kant van die beskuldigde was nie,” sê Liebenberg voorts in sy vonnisoplegging van 13 bladsye.

Die hof het ook uitgevaar daarteen dat die tienermeisie laat in die nag alleen op straat was.

Dit het glo voor daardie noodlottige Novembernag in 2016 vantevore ook gebeur. “Ook teen die ouers deur nie meer betrokke te wees en ingelig oor waar hul dogter daardie tyd van die nag was nie. Maar, weer eens, hoekom moet enigiemand enige tyd van die dag onveilig voel op straat?”

Ter strafverswaring het die oorledene se ma getuig die voorval het 'n vernietigende impak op hul gesinslewe gehad.

Volgens haar het dit beduidende gevolge vir haar welstand en dié van Camila se drie boeties.

Haar huwelik het ook onlangs as gevolg daarvan in die slag gebly, het sy gesê,

Sy het vir Camila onthou as 'n spontane kind, wat groot drome gekoester het.

Sy wou graag eendag 'n geoktrooieerde rekenmeester word.

Goliath het ter strafversagting getuig sy ma is dood toe hy vyf jaar oud was. Sedertdien woon hy by familielede.

Sedert hy 10 jaar oud was tot hy op 20 die misdade gepleeg het, woon hy by 'n tannie van hom.

Sy pa, met wie hy nooit 'n verhouding gehad het nie en wat nooit vir hom gesorg het nie, woon langs die Namibiese kus.

Volgens Goliath het hy die skool in 2012 verlaat nadat hy graad 10 gedruip het.

Hy het toe by dagga betrokke geraak – enersyds as gebruiker, maar ook deur as handelaar die dwelm te help verkoop.

Goliath het voorts getuig hy het sedert sy inhegtenisneming besef “daar is meer aan die lewe as dwelms”.

Hy het hom glo opnuut tot die Christendom verbind, berou sy verkeerde keuses, aanvaar verantwoordelikheid vir sy dade en is reg om daaruit te leer.

Goliath is deur mnr. Mese Tjituri verteenwoordig.

Soortgelyk

 

Uis-aanvaller Charles Namiseb kry 63 jaar

2 ure gelede | Howe

Die eens voortvlugtende Charles Namiseb, wat saam met ‘n makker tereg gestaan het vir die gewelddadige gewapende rooftog op ’n bejaarde egpaar van Uis op...

Padgebruik al duurder

8 ure gelede | Vervoer

Die Padfondsadministrasie (RFA) het ’n 4,3%-verhoging op padgebruik aangekondig, wat van 1 Mei af geld. Dit beteken tariewe by grensposte verhoog, asook tariewe op voertuie...

Padgebruik al duurder

8 ure gelede | Vervoer

Die Padfondsadministrasie (RFA) het ’n 4,3%-verhoging op padgebruik aangekondig, wat van 1 Mei af geld. Dit beteken tariewe by grensposte verhoog, asook tariewe op voertuie...

Gesondheid: Advertensie vals

9 ure gelede | Gesondheid

Die ministerie van gesondheid en maatskaplike dienste (MoHSS) sê 'n inligting wat op sosiale media sirkuleer oor opleidingsgeleenthede by die ministerie is vals. Die vals...

'n Seder val in Swapo

19 ure gelede | Mense

Ronelle Rademeyer - Huldeblyke stroom sedert vroeg gisteroggend in die sosiale media in nadat dit bekend geword het Namibië se voormalige vise­president (2015 – 2018)...

Duitsland gee ou kruis terug

19 ure gelede | Plaaslik

Ronelle Rademeyer - Een van die belangrikste artefakte uit die glorieryke ontdekkersera van die Portugese seevaarders sal in Augustus deur die Duitse museum vir geskiedenis...

Weer vir 20 Mei 2019

19 ure gelede | Weer

WEERWAAK: Koue en winderige toestande word in die Suide verwag. Die nodige voor­sorgmaatreëls moet getref word. BINNELAND: Gedeeltelik bewolk en warm tot baie warm in...

Namport dank 86 werkers af

19 ure gelede | Plaaslik

Die Namibiese haweowerheid, Namport, het Vrydag aangekondig 86 werkers by die vraghouerterminaal by die Walvisbaaise hawe wat in Augustus aan 'n onwettige staking deelgeneem het,...

Speaker dring aan jeug moet by kiesproses betrek word

19 ure gelede | Politiek

Denver Kisting - Die speaker van die Nasio­nale Vergadering (NV), prof. Peter Katjavivi, sê die jeug moet by die verkiesings­proses betrek word.Die uitvoerende hoof van...