Maree Smit se glansvlokkie vlieg hoog

Harley die beste op vasteland

04 September 2018 | Mense
Hy is Namibië se enigste meester- Harley Davidson-tegnikus, hy besit ‘n private vlieglisensie, is tuis in die kajuit van ‘n blitsige tydrenmotor, en het al die moordende Dash-veldfietswedren voltooi.

En nou het hierdie 37-jarige avontuurlustige Namibiër homself as Afrika se beste motorfietsbouer bewys.

Maree Smit het verlede Vrydag gehoor hy is die wenner van die Afrika-afdeling van die Battle of the Kings – ‘n internasionale aanlyn kompetisie wat in Amerika, Asië, Afrika en Europa beslis word.

Terwyl die vreugdevure Vrydag hoog gebrand het by Harley Davidson Windhoek, het die nederige motorfietsmeester aan Republikein verduidelik hoe hy te werk gegaan het om die unieke Harley Davidson ‘48 Sportster met ‘n enjininhoud van 1 200 cc te omskep in die mooiste ding wat Afrika al ooit op twee wiele gesien het.

Smit is ‘n gebore Windhoeker wat in Januarie vanjaar Namibië se eerste meestertegikus vir Harley Davidson geword het toe hy ’n strawwe kursus in Johannesburg met die hoogste punte in die groep geslaag het.

Om te verstaan hoekom die man ‘n swart Harley in goud kon verander, moet ‘n mens eers hoor waar die passie vir enigiets met twee wiele vandaan kom.

“Dit het alles begin toe ek as ‘n nog nat-agter-die-ore knaap al my eerste motorfiets by my pa gekry het. Ek het toe al besef daardie gevoel van ‘ek lewe in die hier en nou’ hoef jy nie in boeke of by lesings te gaan soek nie. Al wat jy moet doen, is om jou een been oor die saal van ‘n motorfiets te swaai.

“Om ‘n motorfiets te ry, is die suiwerste manier om uit te vind hoe dit voel om werklik te lewe. My liggaam en siel word een met daardie diep dreuning van ‘n kragtige motorfietsenjin met die beheermeganismes wat verlengstukke van my gedagtes word. As jy nog nie ‘n motorfiets (of ‘n fiets) gery het nie, sal jy nie verstaan nie.”

Hy sê om ‘n motorfiets ry, is soos die lewe: Om jou balans te behou, moet jy sorg dat jy momentum het.

“Dan maak alles skielik sin,” sê hy.

Maree sê dit was aanvanklik nie die idee om aan die Battle of the Kings deel te neem nie. “Ons Windhoek-personeel het een Vrydagmiddag begin planne beraam om ons eie, unieke Harley te bou. Die plan het skipbreuk gely nadat ons uitgevind het dit sou ‘n baie duur spulletjie wees. Toe hoor ons van die Battle of the Kings, en nadat ek die reëls en regulasies bestudeer het, het ek besef ons sou binne die begroting kon bly wat hoofkantoor bereid was om te bestee.

“Ek het geweet dit sou knetter om teen die gevestigde motorfietsbouers van suidelike Afrika mee te ding met ons beperkte begroting, maar ná deeglike beplanning het ek besluit om met die reuse-uitdaging voort te gaan.”

Hy sê die eerste ding wat hy nodig gehad het, was ‘n vernuftige vennoot in die projek wat al die aanlyn werk en publisiteit kon behartig.

En hy hoef nie ver te gesoek het nie, want Harley Davidson het reeds die perfekte vennoot gehad.

Savannah Collins, die bekende Namibiese musikant en bestuurder van bemarking en verkope by Harley Davidson Windhoek, het haarself die afgelope jaar deeglik bewys en ‘n fakkeldraer van die Amerikaanse motorfietsvervaardiger geword.

Maree se dae het skielik baie lank geword. “Die nagte ook, want ek kon nie my werk in die werkswinkel afskeep nie. Ek het die Sportster gekies omdat ek die potensiaal van baie veranderinge teen billike pryse kon sien. Nadat ek die motorfiets se tenk ‘n baie besonderse wit en silwer glansvlokkie-afwerking gegee het, het ek geweet ek is op die regte pad. Die eerste foto’s van sewe ander bouers in Suid-Afrika het aanlyn begin verskyn en ek het besef ek sou iets spesiaals te voorskyn moes bring. Daardie ietsie spesiaal se naam was geelkoper.

“Ek het voorbeelde daarvan by Harley in SA gesien en dadelik ‘n paar honderd gram geelkoper bestel. Met die aankoms daarvan in Windhoek het ek noukeurig begin om spesifieke onderdele op die draaibank te sny wat uiteindelik op die fiets se tenk en by die luginlaat en ‘n paar ander plekke gesien kan word.

“Dit het reg gelyk en toe het ek my aandag na die fiets se unieke handvatsels en uitlaatpype van Vance & Hines geskuif. Groot besonderhede het ook uitgekom in die maak van die eiesoortige nommerplaathouer, ‘n klein windskepper vooraan die fiets, die agterste modderskerm, die flikkerligte en die unieke Harley Davidson-witwandbuitebande saam met ‘n baie besonderse enkelsitplek.”

Hy sê ná die eerste 25 ure se harde werk kon hy terugstaan met ‘n koue bier en sy seën oor die projek uitspreek.

“Toe was dit nog ure se aandag aan spesifieke besonderhede, maar die plan het bymekaargekom. Savannah se kamera- en bemarkingsvernuf het van ons posts wenners gemaak en ons het dadelik die voortou geneem en dit gemaklik behou tot ons Vrydag loshande as wenners gekroon is.

“Ons is ontsettend trots daarop dat ons al die ander deelnemers met hul reusebegrotings kon uitstof, maar ons weet nie of daar nog ‘n begroting sal wees om internasionaal deel te neem nie.

“Maak nie saak nie, ons is verheug oor ons prestasie,” sê Maree.

Soortgelyk

 

'Boere se veglus verdwyn'

1 uur gelede | Landbou

Ronelle Rademeyer en Elvira Hattingh - Twee bekende boere van die Suide sê die droogte het boere op hul knieë.“Ek was gister by ’n veiling...

Egpaar herontdek skaars plantjie

1 uur gelede | Omgewing

Denver Kisting – ’n Dekaan by die Namibië Universiteit van Wetenskap en Tegnologie (Nust), dr. Rolf Becker, en sy vrou, me. Alma Moller, het verlede...

Kalender 18 Januarie

1 uur gelede | Kuns en vermaak

Nou aan die gang» Die Nasionale Kunsgalery van Namibië (NAGN) bied met trots Unam se beeldende kunste-uitstalling vir 2018 aan. Dié uitstalling is tans...

'DRK maak staat op ons'

1 uur gelede | Politiek

Inwoners van die Demokratiese Republiek van die Kongo (DRK) maak staat op lande deel van die Suider-Afrikaanse Ontwikkelingsgemeenskap (SADC) om die land weer op die...

Operasie Hornkranz: Meer misdaad aangemeld

1 uur gelede | Misdaad

Augetto Graig Die Namibiese polisie het Woensdag by die Israel Patrick Iyambo-polisiekollege in Olympia terugvoering gegee aan die visepresident, mnr. Nangolo Mbumba, en die...

Weer vir 18 Januarie

1 uur gelede | Weer

BINNELAND: Sonnig en warm tot baie warm in die //Kharasstreek, andersins gedeeltelik bewolk en baie tot bloedig warm met 'n paar tot geïsoleerde donderbuie in...

'Die beste tyd van my lewe'

1 uur gelede | Kuns en vermaak

Lloyd ZandbergDie 22-jarige gebore Namibiër Kyle Farrer verwys na homself as koel en kalm. Jy kan dit aan sy voorkoms sien. Eenvoudig, maar deurdink, ‘n...

Besige jaar vir Windhoek se DBV

1 uur gelede | Omgewing

Mariselle Stofberg- Die Dierebeskermingsvereniging (DBV) in Windhoek het 3 695 diere gedurende 2018 ingeneem. Altesaam 2 207 honde, 1 434 katte en 54 ander diere...

Vreemde voetspore is dit toe nie

1 uur gelede | Plaaslik

Francoise Steynberg - Groot was die opgewondenheid van die boer mnr. Frederick de Koker toe hy in November verlede jaar vreemde "voetspore" in rotsformasies naby...