10 September 2018 | Internasionaal

Dodetal styg ná aardbewing in Japan

Japannese owerhede sê 37 mense is dood ná die kragtige aardbewing van 6,7 op die Richterskaal wat verlede week die noordelike eiland van Hokkaido getref het.

Die Hokkaido-regering het gister gesê nóg twee mense word vermis nadat 26 aanvanklik soek was. Al 26 vermistes is van die Atsoema-gebied, waar duisende huise en ander strukture weens grondverskuiwings verwoes is. Sjinzo Abe, premier van Japan, het gesê altesaam 22 000 reddingswerkers met honde het onder die puin na oorlewendes gesoek ná die aardbewing wat Donderdag in die vroeë oggendure voorgekom het.

Sowat 5 000 mense het Donderdagnag in skuilings geslaap.

“Dit was ’n angswekkende nag met verskeie naskokke wat deur die nag gevoel is, maar ons was ten minste saam en ons is dankbaar vir die kos,” het ’n vrou aan NHK, ’n plaaslike uitsaaier, gesê.

Die kragtoevoer na minstens die helfte van die 5,3 miljoen inwoners is intussen herstel nadat dit onderbreek was. - News24/Reuters