16 August 2018 | Ongelukke

Babameisie (1) doodgery

Denver Kisting – ’n Tragedie het gistermiddag op Rehoboth afgespeel toe ’n eenjarige meisietjie doodgery is.
Adj.komm. Eric Clay, die polisiekoördineerder van misdaadondersoeke in die Hardapstreek, sê dié meisietjie, Eldine Claasen, het gister omstreeks 17:10 onder ’n voertuig beland.
Clay sê daar word beweer die 24-jarige bestuurder van die voertuig het ’n motorwassery op Rehoboth besoek om vleis op te tel wat daar vir haar gehou is.
Terwyl sy die houer met die vleis in die voertuig gelaai het, het die peuter vermoedelik ongemerk onder die voertuig ingekruip.
Die vrou het glo weggetrek en per ongeluk oor die meisietjie gery, sê Clay.
Nadat haar aandag op die tragedie gevestig is, het sy stilgehou en saam met die kind se pa die baba opgetel en na die plaaslike hospitaal toe gehaas.
Sy is egter by hul aankoms by die hospitaal dood verklaar.
Clay sê die polisie ondersoek ’n saak van strafbare manslag.