Henco Serdyn in aksie gister teen Wesley Montgomery van Suid-Afrika.
TENNISSPELERS van 13 lande is in aksie by die eerste van twee junior toernooie van die Internasionale Tennisfederasie wat Dinsdag in Windhoek begin het. Die ITF onder 18 junior tennisreeks vir Suider- en Sentraal-Afrika vir 2008 se eerste toernooi duur tot Saterdag. Die toernooi wat geborg word deur G4S, Coca-Cola en CIC Holdings is Dinsdagaand amptelik geopen.
Die tennisspelers van 13 lande – Namibië, Suid-Afrika, Lesotho, Zambië, Zimbabwe, Botswana, Madagaskar, Mosambiek, Malawi, Nigerië, Indië, Israel en Kongo – was almal by die opening van die toernooi. Die ITF-toernooi is ’n goeie geleentheid waar die spelers hul punte op die junior wêreldranglys kan opbou. Henco Serdyn het Dinsdag sy openingswedstryd teen sy landgenoot Calla Joone met 6-2, 6-2 gewen.
Gister het Serdyn in die tweede rondte teen Wesley Montgomery van Suid-Afrika gespeel en het met 6-3, 6-4 gewen. Namibië se voorste junior manspeler se groter krag het die deurslag gegee teen Montgomery, wat nog net 15 jaar oud is en in sy eerste ITFtoernooi speel. Die lenige Serdyn met sy sterk afslane was een te veel. Sy volgende wedstryd is vandag om 08:30 teen Byron Mumyariwa van Zimbabwe.
Riekie Honiball het gister in die vroueafdeling teen Vaniya Dangwalk van Indië gespeel en het in die eerste stel gesukkel om 7-6 te wen, maar het later haar ritme gevind om die tweede stel 6-3 en sodoende die wedstryd te wen. Honiball speel volgende teen ‘n 13-jarige Kongolees, Grace Noah. Ander Namibiërs se uitslae in die toernooi was as volg:
• Schalk-Ruan Bezuidenhout het in die eerste rondte teen Hernus Pieters van Suid-Afrika verloor (7-6, 6-4).
• Calla Joone het sy eerste wedstryd teen sy landgenoot Zandré Duvenhage met 6-2, 6-4 gewen voordat Serdyn hom uitgeskakel het.
• Johan Jansen van Vuuren het in die eerste rondte teen Nicolau Chung van Mosambiek met 6-1, 6-0 verloor.
• Thomas Geier het teen Alexander Viotof van Suid-Afrika met 7-6, 5-7, 7-6 gewen en toe teen Benjamin Lock van Zimbabwe 6-2, 6-2 verloor.
• SP van Wyk het sy openingswedstryd 6-0, 6-1 teen Marlu Janse van Vuuren van Suid-Afrika verloor.
• Michal Muller het in die eerste rondte teen Kondwani Gondwe van Zambië 6-4, 6-4 verloor.
• André Kuschke het teen Samuel Omoile van Nigerië 6-0, 6-0 verloor.
• Mariska Kuschke het 7-6, 6-3 teen Elmien Moets verloor.
• Imke Jagau het Veruschka van Wyk met 6-2, 6-4 geklop.
