Skou se wenners

NA afloop van vanjaar se jaarlikse Ongwediva Handelskou kan ’n klomp instellings spog dat hulle die beste stalletjie in hul onderskeie kategorie gehad het. Republikein se susterskoerant Namibian Sun het vir die derde agtereenvolgende jaar met die eerste plek vir die beste mediastalletjie weggestap.

Die prysuitdelingseremonie is op die voorlaaste aand van die skou gehou. Namibië se nasionale kragvoorsiener NamPower het die eerste plek as algehele beste uitstaller behaal, terwyl The Glass Crafter die toekenning vir beste kuns en kunshandwerk en vir die beste SME (klein- en mediumgrootte ondernemings) uitstalling, opgeraap het. Die prysuitdelingseremonie was vanjaar weer deur Standard Bank Namibia geborg.

Standard Bank se besturende direkteur, mnr. Mpumzi Pupuma, het die organiseerders van die skou vir hul harde werk geloof. Hy het gesê kompetisie is noodsaaklik vir verbeterde produkte en dienslewering. Mnr. Pupuma het belowe dat Standard Bank sal aanhou om die jaarlikse skou te ondersteun.

“Dit bewys Standard Bank is daartoe verbind om die gemeenskap te help waarin ons besigheid doen,” het hy gesê.

Hy het die entrepreneurs in veral die SME-sektor aangemoedig om van bankdienste gebruik te maak.

“Niemand sal die potensiaal van jul besighede ken as julle die geld onder ’n matras wegsteek nie,” het hy gesê.

By dieselfde geleentheid het die Ongwediva dorpsraad se hoof uitvoerende beampte en voorsitter van die skou, mnr. Damien Egumbo, gesê terwyl verlede jaar se skou as die beste tot dusver gesien is, was vanjaar s’n selfs beter.

Die pryse vir die beste stalletjies in die onderskeie kategorieë was as volg:

• Kleinonderneming in die SME-tent: Kuku Mashungu

• Medium onderneming: Ciaobella

• Kuns en kunshandwerk: The Glass Crafter

• Toerisme en gasvryheid: Namibiese Toerismeraad

• Skryfbehoeftes en uitgewers: Bybelvereniging van Namibië

• Weefstof en klerasie: West African Mart

• Regering: Ministerie van Handel en Nywerheid

• Streek- en plaaslike owerheid: Omusati streekraad

• Nie-regeringsorganisasie: Outapi Oorlogsmuseum

• Skoonheidsprodukte: Pelican Hair

• Bankinstelling: Standard Bank Namibië

• Finansiële instellings buiten banke: MVAF

• Internasionaal: Capri Linen (RSA)

• Landbou: Ministerie van Landbou, Water en Bosbou

• Vervaardiging: Cernol Chemicals

• Nywerheid: Transtech Distribution

• Motorhandel: Auas Motors

• Opvoedkunde: Namibiese Instituut vir Openbare Administrasie en Bestuur

• Media: Namibian Sun

• Inligting en Kommunikasietegnologie: MTC

• Korporatief: NamPower