DIE Namibia Democratic Party (NDP) het ’n ideale kandidatelys met mans- en vrouekandidate wat mekaar afwissel by die Verkiesingkommissie ingedien. Boonop is vier lede van die gemarginaliseerde San-gemeenskap ook by die lys ingesluit.
Volgens die president van NDP, mnr. Martin Lukato Lukato, is die 50/50 geslagsverteenwoordiging nie net iets wat op die partylys van die NDP sigbaar is nie, maar dit geld ook alle partystrukture en ook die skadukabinet wat deur die party opgestel is. Die party het vyf visepresidente.
Mnr. Lukato is op 2 Desember 1960 in die Queensland-nedersetting in die Makanga-distrik van Caprivi, ongeveer 70 kilometer wes van Katima Mulilo, gebore. Hy het in 1980 getrou en is die vader van 11 kinders (sewe dogters en vier seuns) en hy het reeds een kleinkind.
Hy is deesdae ’n boer van beroep en boer met beeste en bokke, maar beoefen ook akkerbou.
Vantevore het hy diens gedoen in die polisiemag en vanaf 2000 tot 2001 was hy werksaam by die Verenigde Nasies in New York, die VN se takkantoor in Darwin, Australië en ook by die VN se kantoor in Oos-Timor.
Hy vertel dat sy party weens ’n gebrek aan geld nie ’n kandidaat vir die presidentsverkiesing kon stel nie.
