SA minister looi landgenote oor ‘ekonomiese xenofobie’

DIE Suid-Afrikaanse mi­nister van openbare onder­nemings, mnr. Alec Erwin, het sy landgenote gelooi oor hul kritiek op Eskom se kraguitvoere na buurlande soos Namibië. Luidens die Suid-Afri­kaanse Nuusagentskap (Sapa) het mnr. Erwin ty­dens ‘n nuuskonferensie aan joernaliste gesê die eis deur verskeie sektore van die Suid-Afrikaanse same­lewing dat Eskom sy kraguitvoere na buurlande moet staak, kom neer op “ekonomiese xenofobie (vreemdelinge­vrees)”.

“Ons hanteer ons kliënte in buurlande soos kliënte; hulle het nie alles wat ons Suid-Afrikaanse kliënte het nie, maar ons moet voort­gaan om hulle soos kliënte te behandel.” Mnr. Erwin het luidens Sapa gesê dit is ‘n geïntegreerde sisteem waar Suid-Afrika krag invoer van sy buurlande – en sal voort­gaan om dit in die toekoms te doen – en huidig krag aan hulle verkoop.

Hy het ook gesê hy kan nie die logika verstaan van die druk wat op Suid-Afrika uitgeoefen word om sy buite­landse kliënte te straf nie. Hy het verder gesê dit is vir hom onverstaanbaar dat Suid-Afrika as kri­mineel beskou word omdat hy krag uitvoer. Mnr. Erwin het benadruk dat Eskom se buitelandse kliënte behandel sal word soos enige ander kliënt en dat dié verstandhouding nie sal verander nie.

Volgens hom is die hoe­veelheid krag wat Eskom na buurlande uitvoer nie soveel dat dit ‘n noemenswaardige impak op die Suid-Afri­kaanse elek­tris­teits­voor­sieningsisteem het nie. “Maar laat ek vir u sê, daar gaan ‘n dag kom dat ons krag van ons buur­lande gaan invoer in hoe­veelhede wat baie noe­menswaardig gaan wees.

“As ek in die Kongo was of in Mosambiek en een of ander Suid-Afrikaanse re­gering sny my krag af wan­neer hy ‘n krisis het sonder inag­neming van die invloed wat dit op my het, gaan ek baie seker maak dat ek dit in die toekoms ook aan hom doen,” het die minister aldus Sapa gesê.

Namibië voer danksy die goeie vlak van die Kunene-ri­vier en die feit dat al drie tur­bines by die waterkragskema by Ruacana tans krag opwek, snags sowat 50 MW krag na Suid-Afrika uit. Intussen is ‘n hoëvlak vergadering tussen Eskom en NamPower vandeesweek in Wind­hoek gehou om die voort­ge­sette kraglewering tussen die twee lande te bespreek.