SA deel SKA-projek met Australië

Die wêreld se grootste en mees gevorderde radioteleskoop, genoem die Square Kilometer Array (SKA) wat in staat sal wees om buiteruimtelike lewe in die heelal op te spoor, sal tussen Suid-Afrika en Australië gedeel word. Die aankondiging is Vrydag in Nederland gemaak deur die vyf SKAlidlande wat die finale besluit moes neem, naamlik Kanada, China, Italië, Nederland en die Verenigde Koninkryk.

Die SKA in Suid-Afrika word by Carnarvon in die Noord-Kaap opgerig, met satellietstasies in agt ander lande in Suider-Afrika. Die teleskoop sal uit 3 000 antennas bestaan wat oor die streek versprei is. Namibië is een van die lande wat Suid-Afrika met hierdie projek van ongeveer N$26 miljard gaan bystaan. Australië sal weer deur Nieu-Seeland ondersteun word. Die kabinet het einde verlede jaar reeds Namibië se betrokkenheid goedgekeur en vier plekke in die land bekendgemaak waar satellietstasies opgerig gaan word. Die plekke is Maltahöhe, Karibib, Okahandja en Opuwo. Die kabinet het verder ingestem dat Namibië tegniese inligting oor byvoorbeeld radiofrekwensies, kommunikasienetwerke, paaie en ander infrastruktuur in die omgewing van die satellietstasies beskikbaar stel.

Daarmee saam sal Namibië logistieke bystand verleen wanneer die omgewingsimpakstudie gedoen word. Die Suid-Afrikaanse navorsers en wetenskaplikes wat aan die projek werk, sal werkpermitte ontvang. Mnr. John Sifani, adjunkdirekteur van navorsing, wetenskap en tegnologie in die Ministerie van Onderwys, het vroeër gesê: ?Met die SKA-projek in die Noord-Kaap sal Suider-Afrika beheer verkry oor die optiese, gamma- en radiostrale in die heelal. Die SKA sal 50 keer kragtiger wees as enige ander radioteleskope.?

Die HESS-projek (High Energy Stereoscopic System) in die Khomas Hochland buite Windhoek asook SALT (Southern Africa Large Telescope) naby Sutherland in die Karoo stel astronome en kernfisici in staat om deur die ?lees? van gammastrale en optiese strale baie ver in die heelal te sien. Sifani wou hom nie uitlaat oor wanneer Namibië met die bouwerk aan die satellietstasies gaan begin nie en wat die koste daarvan gaan beloop nie.

?Die Minister (van Onderwys, dr. David Namwandi) is die een wat daardie inligting bekend moet maak en hy is nie op die oomblik in die land nie,? het hy by navraag gesê. Die Suid-Afrikaanse minister van wetenskap en tegnologie, me. Naledi Pandor, het intussen bekendgemaak dat haar land met die ontwerpfase gaan begin.

?Ons het reeds heelwat as Suid-Afrika (in die projek) belê en die wêreldwye vennote sal nou hul kant moet bring. Die internasionale finansiering sal ons help met die implementering. Die bedrag beloop ongeveer R26 miljard,? het die minister volgens ?n berig op Nuus24 gesê. Die eerste navorsingsresultate word teen 2019 verwag en teen 2024 sal die teleskoop ten volle operasioneel wees. Superrekenaars sal miljarde verwerkings per sekonde doen.