Die president van die RDP, mnr. Hidipo Hamutenya, omring deur entoesiastiese partyondersteuners wat kom luister het na die bekendmaking van die partylys vir die verkiesing van lede van die Nasionale Vergadering.
DIE Rally for Democracy and Progress (RDP) het Sondag ná afloop van ’n geslaagde kieskollege sy partylys vir die komende verkiesing vir lede van die Nasionale Vergadering bekendgemaak.
Mnr. Hidipo Hamutenya
Altesaam 312 afgevaardigdes uit al 13 streke van die land het aan die kieskollege deelgeneem en die 72 lede vir die partylys verkies.
Volgens die president van die RDP, mnr. Hidipo Hamutenya, was die proses “demokraties, inklusief, deursigtig en vreedsaam”.
“Ons is tevrede met die uitslag van die vergadering van die kieskollege. Wat etnisiteit, geslag, geslagte en kapasiteit betref, het die RDP se kandidatelys ’n uiteenlopende en verteenwoordigende groep van ons nasie saamgebring. Met hierdie gedugte span sien ons met optimisme uit na die komende verkiesings.
Mnr. Gerson Mutendere
“Ons is daartoe verbind om ’n lewenskragtige, vreedsame en opvoedkundige veldtog te voer. Beledigings en persoonlike aanvalle sal nie deel van ons veldtog wees nie. Ons is vasbeslote om die politiek van intimidasie te verslaan en die politiek van vrees te verwerp.
"Ons wil diegene wat die RDP as ’n Oukwanyama-party uitgemaak het, laat skaam kry. Ons bly bewus van die gevare van etnies gesentreerde politiek en vermy dus daardie slaggat.
“Ons is bekommerd oor die kullery met verkiesings en verkiesingsbedrog. Die gebrek aan ’n gelyke speelveld is reeds ’n teken van pogings om ons demokratiese proses te ontspoor.
Mnr. Steve Bezuidenhout
“Ons het die gevaar van verkiesingsbedrog in ander Afrika-lande in onlangse tye gesien. Ons kan nie die lesse van Kenia en Zimbabwe vergeet nie,” het mnr. Hamutenya gesê.
Hy het ’n beroep op die media, menseregte-organisasies, die kerke en elke burger van die land gedoen om die politiek van geweld en enige poging om verkiesingsbedrog te pleeg, te verwerp en voorvalle hiervan aan die lig te bring.
Mnr. Hamutenya het agt mense tot die lys genomineer.
Mnr. Heiko Lucks
Hulle is: mnre. Mike Kavekotora, Nic Kruger, Gerson Mutendere (die sekretaris-generaal van die Federasie van Namibiërs met Gestremdhede), Elikan Nghimwene, Moses Amukoto, Ismael Shailemo asook mee. Judy Meleki en Priscilla Kambode.
Altesaam 23 van die kandidate op die lys is vroue.
Mnr. Hamutenya, wat ook die presidentskandidaat van die party is, is nommer een op die lys, mnr. Steve Bezuidenhout is nommer twee, mnr. Jesaya Nyamu is nommer drie en me. Agnes Limbo nommer vier. Hulle is outomaties op die lys. Mnr. Anton van Wietersheim het die meeste stemme op die kieskollege gekry en is nommer vyf op die lys.
