Pohamba op Oshikango

▪ Placido Hilukilwa by Oshikango
 
SWAPO het sy beloftes wat in die verkiesingsmanifes van 2004 vervat is, nagekom en selfs meer gedoen as wat die party belowe het, het President Hifikepunye Pohamba gesê toe hy Sondag ’n Swapo-vergadering by Oshikango in die Ohangwena-streek toegespreek het.

Hy het ontwikkelingsprojekte wat voltooi is, genoem asook die wat tans aan die gang is. Dit sluit in die oprigting van die streekraadslede se kantore in alle kiesafdelings, die oprigting van hospitale en klinieke, die begin van die rysprojek in Caprivi, die fakulteit van ingenieurswese op Ongwediva en Unam se mediese skool wat aanstaande jaar met klasse begin.

“Ons kan slegs hierdie land ontwikkel indien ons opgeleide mense het,” het hy gesê.

Hy het verduidelik dat politieke ampsdraers kragtens die land se Grondwet, slegs vir beperkte termyne verkies word, waarna nuwe verkiesings gehou moet word.

“Die mag lê by die kiesers. Die mandaat wat die Namibiese kiesers aan Swapo en aan my as die land se President gegee het, verstryk op 20 Maart 2010. Die Grondwet vereis vars verkiesings voor daardie datum,” het hy gesê en bygevoeg: “Ons is hier om ’n nuwe vyfjaar termyn te vra sodat Swapo met die ontwikkeling van die land kan voortgaan.”

Mnr. Pohamba wat al die stemgeregtigdes versoek het om in die komende verkiesings te gaan stem, het gesê om vir Swapo te stem, sou ’n “verstandige stap” wees.

Mnr. Pohamba het gesê hy voel sleg wanneer hy mense sien wat in die verlede Swapo-kleure gedra het, maar nou ander partye se klere aantrek.

Hy het egter sy party se lede en ondersteuners versoek om nie ondersteuners van ander partye uit te tart nie, en wanneer hulle self uitgetart word, om nie die reg in eie hande te neem nie, maar eerder die polisie te nader.

Mnr. Pohamba was Sondag op Oshikango nadat hy die vorige dag ’n soortgelyke vergadering op Outapi in die Omusati-streek toegespreek en die konstruksie van die Oshikuku-Okalongo-pad amptelik geopen het.