Oupa sterf in reddingspoging

’n TRAGEDIE het hom Sondag op Langstrand afgespeel toe ’n inwoner van Walvisbaai die see ingestorm het om sy kleinkinders te red en in die proses aan ’n hartaanval gesterf het.

Volgens sy dogter, me. Zanobia Johannes, het mnr. Moegamat Armien Kamaldien (65) probeer om sy twee kleinkinders te help wat deur die branders ingetrek was. Hy het tydens die reddingspoging ’n hartaanval gehad en hy het op die toneel gesterf. Die twee kinders is deur onbekende weldoeners veilig aan wal gebring.

Mnr. Kamaldien was lank by die Walvisbaaise munisipaliteit werksaam en het later sy eie onderneming, Armien Construction, op Walvisbaai bedryf.