NUNW stuur tien na Swapo-kieskollege

DIE Nasionale Unie vir Namibiese Werkers (NUNW) het aangekondig dat benewens sy vyf kandidate die vakverbond ook vyf stemgeregtigde afgevaardigdes na Swapo se kieskollege dié naweek stuur.

Die sekretaris-generaal van die NUNW, mnr. Evilastus Kaaronda, het dié week op ’n nuuskonferensie met die inligting vorendag gekom. Hy is van mening dat die ander vleuels van Swapo ook elk vyf afgevaardiges by hul lys van kandidate na die kollege kon stuur.

Die NUNW stuur vanjaar drie vroue en twee mans na die kieskollege as kandidate. Hulle is mnr. Kiros Sackarias van die Namibiese Unie vir Voedsel- en Verwante Bedrywe (Nafao); me. Taimi Nuujoma van Napu; me. Bobby Kandjala, die NUNW se koördineerder in die westelike deel van die land; me. Sarafina Kandere, ook van Napu, en mnr. Basillus Haingura van die Namibiese Nasionale Onderwysersunie (Nantu).

Die name van die afgevaardigdes wat nie verkiesbaar sal wees nie, maar volgens mnr. Kaarondo wel stemgeregtig is, is nog nie bekend nie.