Moord en geweld ruk dorpe in die Suide

’n TWEEDE moord in minder as drie dae het Keetmanshoop geskud. Die moord op me. Petrina Hendrika Isaak (39) gister volg op die van mnr. Pieter Jacobs afgelope Sondag (berig hiernaas).

Isaak se lyk is by die begraafplaas in die Tseiblaagte-woonbuurt deur haar suster ontdek. Die moord het tussen middernag en 06:00 gebeur, het hoofinspekteur Bennie Groenewald van Keetmanshoop gesê.

Groenewald het gesê Isaak het die vorige aand by haar suster in Tseiblaagte gekuier, waar die oorledene ook gewoon het. “Isaak se suster en die se voormalige kêrel het later vir Isaak halfpad huis toe vergesel. Die suster en ekskêrel het by die begraafplaas omgedraai. Toe Isaak nie haar selfoon beantwoord nie, het haar suster onraad vermoed en haar gaan soek.”

Groenewald sê die polisie is deur die suster in kennis gestel en was om 06:00 op die toneel.

Die polisie vermoed dat die vrou verwurg is, maar die nadoodse ondersoek moet nog uitgevoer word om die presiese oorsaak van haar dood te bepaal.

“Die oorledene het nog haar klere aangehad en dit was nie geskeur nie, maar haar skoene en selfoon was nie meer by haar nie,” het Groenewald gesê. Die oorledene het ook geen sigbare merke op haar lyf gehad nie.

Geen verdagtes is nog in hegtenis geneem nie en die polisie se ondersoek duur voort.

Messtekers maai op drie dorpe
 
DRIE mense, insluitend ’n polisiebeampte, het die naweek in drie afsonderlike gevalle op Keetmanshoop, Karasburg en Lüderitz as slagoffers van messteke gesterf.

Adj.komm. Rudolf Isaak van die Karasstreek het gesê op Keetmanshoop is mnr. Pieter Jacobs (34) Sondag om 14:20 in die Noordhoek-woonbuurt doodgesteek. ’n Verdagte is dieselfde dag in hegtenis geneem.

“Die oorledene en drie mans het die middag gekuier en een van die mans in die geselskap het die ander met ’n mes gekrap. Die drie het hom gevra om op te hou, maar hy het aangehou,” het Isaak gesê.

“Die drie het toe besluit om huis toe te gaan en het in die rigting van die Tseiblaagte-woonbuurt begin stap. Die vermeende moordenaar het hulle agtervolg en het al drie mans met ’n mes gesteek.”

Jacobs is in sy rug en hart gesteek en het op die toneel gesterf. Mnr. Charles Rooi (35) is in sy gesig en in sy linkerskouer gesteek, terwyl mnr. Brian Isaak ’n steekwond in sy linkerblad opgedoen het. Hulle is vir behandeling na die staatshospitaal geneem en nog dieselfde dag ontslaan.

Die vermeende moordenaar (27) sou gister in die hof verskyn.

• Op Karasburg het mnr. Rudolf Smith (43) gesterf nadat hy ook die slagoffer van ’n messteker was. Mnr. Niklaas Babiep (51) is in hegtenis geneem en het reeds in die hof verskyn.

“Smith en Babiep het Vrydag tussen 18:00 en 18:30 oor die eienaarskap van ’n donkie gestry, nie ver van die polisiekantoor nie. Die uiteinde was dat Smith aan die linkerkant van sy nek gesteek is,” het adj.komm. Isaak gesê. Smith het op pad na die hospitaal beswyk.

• Op Lüderitz is konstabel Johannes Jwhano Joseph (24) glo deur ’n 40-jarige man by die Moonsjebeen doodgesteek. Die voorval het Sondag kort ná 02:00 gebeur toe Joseph die eienaar van die sjebeen gehelp het om sy besigheid te sluit.

“Een besoeker wou nog ’n bier hê, maar dit is geweier. Die man het die oorledene bokant sy hart en in sy nek gesteek,” sê Isaak.