‘n SOMBERE atmosfeer het gister op Lüderitz geheers tydens die herdenking van Heldedag waar die gebeendere van persone wat in 1999 in die Sperrgebiet ontdek is, begrawe is.
Die herbegrawe van die menslike oorskot was die hooftema van die dag waarop die slag van Omugulu-gwoOmbashe gewoonlik herdenk word.
Dié slag, wat op 26 Augustus 1966 plaasgevind het, word algemeen as die begin van die Namibiese vryheidstryd beskou.
President Hifikepunye Pohamba, die Eerste Minister, mnr. Nahas Angula, die Adjunkpremier, mnr. Marco Hausiku en die stigterspresident van Namibië, mnr. Sam Nujoma, het die teraardebestelling bygewoon.
Die sogenaamde Charlottental-oorskotte is met volle militêre eerbewys begrawe.
Kranse om die dade van Namibië se helde van die Vryheidstryd te vereer, is ook tydens die geleentheid by die grafte gelê.
