Me. Izelle de Greeff (née Diedericks) en me. Mariehette Coetzee was in 1998 die wenners van ‘n kompetisie wat Republikein aangebied het tydens een van Michael Jackson se besoeke aan Namibië. Elkeen het ‘n ondertekende foto van die popikoon gewen, maar ongelukkig is albei se foto’s nou soek. “Dit voel so onwerklik en dis baie hartseer. Ek kon dit nie glo toe ek van sy dood hoor nie. Net Saterdagaand het my ma my nog gevra of ek die foto onthou en sedertdien soek ons daarna tussen al die goed wat in bokse weggepak is,” het me. De Greeff vertel. “Michael se dood was ‘n groot skok en toe ek daarvan hoor, het ek onmiddellik van die destydse fotokompetisie onthou. Ek is seker my foto is nog iewers in my ouerhuis, maar met al die trekkery het ons dit seker net nog nooit weer uitgepak nie,” het me. Coetzee gesê.