Storm rig skade aan op Aussenkehr

DIT was soos ’n ligte orkaan. So beskryf Frik Conradie van Aussenkehr die storm wat Maandagnamiddag op die dorp op die wal van die Oranjerivier uitgebreek het.

“Dit was chaos!” Die storm het net 7,4 mm reën gebring, maar die wind het teen sowat 80 km/h gewaai en alles was binne twintig minute oor, vertel nog ’n inwoner, Wynand Saayman. Niemand is in die voorval beseer nie, maar die dakke van Namibia Development Corporation se enkelkwartiere het afgewaai en die sonverwarmers het van die dakke afgeval.

“Motorafdakke het soos vlieërs gewaai, maar net een motor is effens beskadig,” sê Frik. Die wind het ook ’n gat uit Kaap Agri se voorraadstoor geruk.

Al wat ’n groot boom is, is ontwortel en takke het gebreek. Selfs die grootste bome kon die sterk wind nie weerstaan nie. Op een plek het ’n garage se hoek gekraak. ’n Groot advertensiebord het ook in die slag gebly en is agteroor gebuig. ’n Heining van pale en riet is ook nie oorgesien nie en het plek-plek platgeval.