Ouma Anna, ’n jarelange inwoner van Rehoboth, word vandag 100 jaar oud en is gereed om nog baie jare aan te pak.
Me. Anna Coetzee wat oorspronklik van Aroab kom, woon reeds 79 jaar op Rehoboth.
Volgens haar is die rede vir haar lang lewe die feit dat sy haar ouers altyd gerespekteer en geëer het.“Die Bybel sê, eer jou vader en jou moeder en jou dae sal verleng word,” het sy gesê.
Ouma Anna het haar man, Hendrik, op Aroab ontmoet toe sy 21 jaar oud was. Hy is in 1979 oorlede. Behalwe vir probleme met haar sig en gehoor, is sy nog sterk en gesond en sy het tot onlangs nog weekliks selfs ’n paar kilometer gestap.
Ouma Anna het tien kinders in die lewe gebring van wie vier nog leef. Sy is die trotse ouma en oumagrootjie van 45 kleinkinders en 86 agterkleinkinders.
