Die 24-jarige Meryl Mwampamba, wat bekendheid verwerf het as die Namibiese verteenwoordiger in die Big Brother Africa 2- en 5-weergawes, het Maandagoggend in die Katutura-hospitaal geboorte aan haar dogtertjie geskenk. Meryl Shikwambane is laat verlede jaar met die Tanzaniër Mwisho Mwampamba getroud nadat beide in 2010 in die Big Brother All Stars-huis was. Beide het tevore aan die kompetisie deelgeneem (Meryl in 2007 en Mwisho in 2003), met Mwisho wat gesamentlik langer as enigiemand anders in die Big Brother Africa-huis was (197 dae). Die paartjie was sedertdien onafskeidbaar en het die bynaam “Merylisho” verwerf, wat steeds as Meryl se Twitter-naam dien.
