Polisiebeampte vra vir borgtog
Geheime verweer dra geen gewig vir verlening van borgtog
Jacqueline Louw - Die 30-jarige mnr. Albertus !Ganeb wat na bewering sy twee jong seuns, Tertius Romeo Shaun Swartz (7) en Gregory O’Grady Holmes Swartz (4) vermoor het, het gister vir sy aansoek om borgtog weer in die hoërhof voor waarnemende regter Boas Usiku verskyn.
Prokureur Afrika Jantjies het namens !Ganeb betoog dat hy opnuut gedagvaar en in hegtenis geneem moet word omdat sy inhegtenisneming ná sy vrylating in Oktober verlede jaar omdat polisieondersoeke nie afgehandel was nie, glo onregmatig was. Hy het verder aangevoer dat me. Romily Swartz, die ma van die twee vermoorde kinders, nie in gevaar sou wees indien die beskuldigde op borgtog vrygelaat word nie. “Daar is geen bewys van enige dreigemente teen Swartz nie”, het die verdediging aangevoer. Jantjies het verder betoog indien borgtog nie aan die beskuldigde toegestaan word nie, dit ’n skending van die beginsels van geregtigheid en vryheid sal wees. Hy het die hof versoek om borgtog van N$5 000 toe te staan.
Adjunk-aanklaer-generaal Antonia Verhoef het namens die staat betoog dat ’n geldige lasbrief vir die inhegtenisneming van die beskuldigde op ’n klag van dubbele moord wel uitgereik was. Sy het verwys na getuienis wat tydens die borgtogaansoek gelewer is om te toon die beskuldigde was ’n bedreiging vir Swartz en haar nuwe vriend. Volgens Verhoef het die beskuldigde Swartz se vriend voor die moord gebel en hom gedreig dat hy begrawe sal word. Sy het verwys na verdere getuienis wat voor die hof gedien het waarvolgens !Ganeb ’n selfoonoproep na ’n polisiebeampte gemaak het en gesê het: “Jy kan die lyke gaan bymekaarmaak. Ek gaan my meisie doodmaak en jy kan gaan en nog ’n lyk haal.” Verhoef het ook na ’n SMS van !Ganeb aan Swartz verwys wat as getuienis voor die hof gedien het wat lui: “Jou kinders is dood. Kom kyk as jy my nie glo nie. Jy het dit veroorsaak.”
Volgens Verhoef het die staat ’n sterk saak en forensiese getuienis is reeds gelewer wat die beskuldigde met die misdaad verbind.
!Ganeb het die hof meegedeel dat sy verweer ’n geheim is. Verhoef het geargumenteer dat hierdie verweer geen gewig in die aansoek om borgtog dra nie.
Usiku sal op 6 Oktober sy uitspraak oor die borgtog lewer.
Prokureur Afrika Jantjies het namens !Ganeb betoog dat hy opnuut gedagvaar en in hegtenis geneem moet word omdat sy inhegtenisneming ná sy vrylating in Oktober verlede jaar omdat polisieondersoeke nie afgehandel was nie, glo onregmatig was. Hy het verder aangevoer dat me. Romily Swartz, die ma van die twee vermoorde kinders, nie in gevaar sou wees indien die beskuldigde op borgtog vrygelaat word nie. “Daar is geen bewys van enige dreigemente teen Swartz nie”, het die verdediging aangevoer. Jantjies het verder betoog indien borgtog nie aan die beskuldigde toegestaan word nie, dit ’n skending van die beginsels van geregtigheid en vryheid sal wees. Hy het die hof versoek om borgtog van N$5 000 toe te staan.
Adjunk-aanklaer-generaal Antonia Verhoef het namens die staat betoog dat ’n geldige lasbrief vir die inhegtenisneming van die beskuldigde op ’n klag van dubbele moord wel uitgereik was. Sy het verwys na getuienis wat tydens die borgtogaansoek gelewer is om te toon die beskuldigde was ’n bedreiging vir Swartz en haar nuwe vriend. Volgens Verhoef het die beskuldigde Swartz se vriend voor die moord gebel en hom gedreig dat hy begrawe sal word. Sy het verwys na verdere getuienis wat voor die hof gedien het waarvolgens !Ganeb ’n selfoonoproep na ’n polisiebeampte gemaak het en gesê het: “Jy kan die lyke gaan bymekaarmaak. Ek gaan my meisie doodmaak en jy kan gaan en nog ’n lyk haal.” Verhoef het ook na ’n SMS van !Ganeb aan Swartz verwys wat as getuienis voor die hof gedien het wat lui: “Jou kinders is dood. Kom kyk as jy my nie glo nie. Jy het dit veroorsaak.”
Volgens Verhoef het die staat ’n sterk saak en forensiese getuienis is reeds gelewer wat die beskuldigde met die misdaad verbind.
!Ganeb het die hof meegedeel dat sy verweer ’n geheim is. Verhoef het geargumenteer dat hierdie verweer geen gewig in die aansoek om borgtog dra nie.
Usiku sal op 6 Oktober sy uitspraak oor die borgtog lewer.
Kommentaar
Republikein
Geen kommentaar is op hierdie artikel gelaat nie