Nie hoofstroom, en trots daarop

Evangelis Charles van Wyk skryf:
Ek rig hierdie skrywe na aanleiding van dr. Adriaan Roux se brief met die titel “Verwaandheid in die Kerk”.
Na die skrywe van so ‘n verdedigingsbrief vir die hoofstromers sal u beslis ‘n klop op die skouer kry. Sal altyd net goed wees om skrifverwysings neer te pen langs elke stelling wat u rondom die woord maak. Oor die gawe het jy geen keuse, want dis God wat gee volgens 1 Kor. 12 vers 8. In vers 11 sê die woord uitdruklik dat die gees aan elkeen afsonderlik uitdeel soos Hy wil.
Ek wil egter sê dat al hierdie goed, gawes en vrug, en die balans daartussen net vir ons help tydens ons verblyf op aarde, maar beslis nie vir ons ‘n padkaart is om by die hemel uit te kom nie. Weet u hoekom lyk die wêreld so, terwyl daar so baie kerke is. Dis oor redenasies wat geen saligheidswaarde het nie.
Kom draai na die oorspronklike plan, en dan antwoord u op hierdie skrywe dat die hoofstromers ook kan hoor hoekom die kerk nie by die volgende skrifte hulle stem wil laat hoor nie.
Toe Jesus na Sy opstanding self aan die elf dissipels verskyn het volgens Markus 16 vers 14, sê Hy vir hulle in vers 15 en verder: Gaan die hele wêreld in en verkondig die evangelie aan die ganse mensdom. Hy wat glo en hom laat doop, sal gered word, maar hy wat nie glo nie, sal veroordeel word.
Glo beteken dood eenvoudig om die Here Jesus te aanvaar deur te glo dat hy uit die dood opgestaan het, en nadat jy geglo het, jou te laat doop. Om te kan glo, moet jy dus groot wees, en daarom is die doop vir grootmense.
In Johannes 3 vers 15 is die Here Jesus se woorde aan Nicodemus, as iemand nie weergebore word uit water en gees nie kan hy in die koninkryk van God nie ingaan nie.
Nicodemus se redenasie, seker vandag nog baie van die hoofstromers s’n: ek is dan al oud. Jesus se antwoord: Jy is die leraar van Israel en jy weet hierdie dinge nie. Hoe kan ‘n man wat nie by die wedergeboorte was nie, iemand na wedergeboorte lei?
Onthou, die kweekskool kan geen wedergeboortesertifikaat aan jou uitreik nie.
My vraag aan u: hoekom besprinkel die hoofstroompredikante babas en noem dit doop? Die Here Jesus het volgens Markus 10 vers 16 Sy arms om die kindertjies geslaan en hulle geseën. Jesus is volgens Markus 1 vers 9-10 in die Jordaan gedoop deur Johannes. Toe hy opklim uit die water, sien Hy die hemele skeur en die gees soos ‘n duif op hom neersak (vers 11). ‘n Stem uit die Hemel, My geliefde seun in wie ek ‘n welbehae het.
Die individu kan net die doping in die gees ontvang nadat hy of sy gedoop is. Die kerk praat van God se gees, maar ken dit nie, want die Bybel sê waar die gees van die Here is, is daar vryheid. Mense geniet nie God se vryheid nie, want die woord klink goed en mooi, maar die gees van God is nie teenwoordig nie.
My tweede vraag. Hoekom word kinders op 16/18 jaar aangeneem deur die hoofstroomkerke? As u vir my die skrif kan gee, sal ek dit waardeer. My Bybel sê in Johannes 1 vers 12): Maar almal wat Hom (Jesus) aangeneem het, aan hulle het Hy mag gegee om kinders van God te word, aan hulle wat in Sy naam glo.
Julle neem die kinders aan. Dus is hulle kinders van die kerk en nie kinders van God nie.
Ek rig hierdie skrywe namens geen stroom nie, maar sodat die Seun van God hierdeur verheerlik kan word.