Damvlakke kommerwekkend laag

Elvira Hattingh – Die drie damme wat Sentraal-Namibië en die hoofstad van water voorsien, het nou gesamentlik net 8,7% of 13,476 Mm³ water oor. Tesame met die Friedenau- en Goreangabdam, is sentrale damme die leegste in die land.
Op nasionale vlak het alle damme gesamentlik 28,3% (197,984 Mm³) water oor.
Volgens die jongste damverslag is die Omatakodam heeltemal leeg, met die Von Bachdam wat na raming 8,545 Mm³ water (of 17,6%) oor het en die Swakoppoortdam wat 4,931 Mm³ of 7,8% water hou. Die Friedenaudam het net sowat 0,391 Mm³ (27,2%) water oor en die Goreangabdam is 100% (3,621 Mm³) vol, alhoewel dié dam se water te ernstig besoedel is om as drinkwater te gebruik.
Die Otjiverodam hou tans 36,6% (3,589 Mm³) water, met Otjivero se slikdam wat 2,9% vol is. Die Tilda Viljoen- en Daan Viljoendam hou onderskeidelik 26,1% (0,320 Mm³) en 33,6% (0,144 Mm³) water, wat beteken damme in die Gobabis-omgewing is gesamentlik sowat 22,2% vol.
Die Hardapdam hou steeds die meeste water teen 89,041 Mm³, maar is net 30,2% vol, gevolg deur die Nautedam wat 80,1% vol is en 66,950 Mm³ water hou. Die Oanobdam is 29,6% (10,225 Mm³) vol, terwyl die Dreihuk- en Bondelsdam leeg is. Die Olushandadam is 20,2% vol en hou 8,561 Mm³ water.