Walvis speel by Walvisbaai

Herman Theron sê hy was Donderdag op pad van Walvisbaai na Langstrand toe hy hierdie walvis by Dolfynstrand naby die kus gewaar het. "Mense wat met skibote dieper die see ingaan, sien van tyd tot tyd walvisse, maar hierdie een was rêrig naby aan die strand. Ek was gelukkig om ’n kamera by my te hê en kan steeds nie my geluk glo nie. Ek is op Walvisbaai gebore, maar kon nog al die jare nie verstaan hoekom die dorp so genoem word nie omdat ek nog nooit 'n walvis van die strand af gesien het nie. Vir my is Walvisbaai voortaan weer Walvisbaai!" skryf Herman in sy e-pos.