Vincent van Gogga deur Philip de Vos en illustrasies deur Cora Coetzee

DIE verhaal van Vincent van Gogga begin in 'n pretpark, op 'n leë erf in 'n groot stad. Langs die spooktrein en langs die stalletjie met sy Donald Duck-eende met koppe wat op en af wip, staan 'n donkerblou woonwa, vol sonne en mane en sterre geverf. En op die sykant van die woonwa pryk in groot geel letters: Madame Zelda. Egiptiese sigeuner vir liefde, geld en geluk.
Nou wat op aarde het madame Zelda en haar woonwa vol sonne en mane en sterre uit te waai met Vincent van Gogga? Wie de joos ís Vincent van Gogga?
Die antwoord is baie eenvoudig: Lees en vind uit!
Vincent van Gogga is 'n boek vir kinders van alle soorte: klein kinders en kleinkinders, groot kinders en oorgroot kinders en voorkinders en agterkinders en agterstevoorom kinders.
'n Heruitgawe van een van Philip de Vos se snaaksste boeke.
Philip de Vos is in Bloemfontein gebore en was 'n onderwyser voor hy Kaap toe getrek het. Hy het vanaf 1962 al meer as 60 operarolle uitgebeeld. Hy is ook 'n bekende fotograaf en het al eenmanuitstallings van sy werk gehou en verskeie pryse gewen.
Vincent van Gogga (ISBN: 079 814 6567) is deur Human & Rousseau vrygestel en kos N$69,95. Dit is geskik vir 9- tot 12-jariges.