Aspects of Namibia, ’n fotografiese uitstalling oor Namibiese landskappe deur die bekende vroue-fotograaf Gay Burdett, open Maandag om 18:00 by die Franco-Namibiese Kultuursentrum en duur tot 25 September.
Sy is in Lincolnshire, Engeland gebore en het daar grootgeword. Nadat Gay haar pottebakkery en grafiese ontwerp en fotografiestudies voltooi het, het sy eers by Conde Nast Publications gewerk en was later redakteur van Vogue Magazine.
Na elf jaar by die tydskrif het sy eers vryskutwerk gedoen en toe weer voltyds gewerk voordat sy besluit het om haarself as voltydse landskap-fotograaf te bekwaam.
Gay het al talle besoeke aan Afrika afgelê en stal nou haar pragfoto’s van Namibiese landskappe uit. Gay beskryf haarself as ’n alleenmens wat nie gesteur wil word terwyl sy foto’s neem nie.
Sy geniet dit om alleen te wees terwyl sy die skoonheid van die landskap voor haar inneem en dan op kamera vasvang. Sodoende kan sy blykbaar alles ten volle in oorweging neem en dieper as die oppervlak kyk.
