Slaan vuur met ’n petrolsak

DIE spook van die verkiesings weier om te gaan lê en hoe meer vure doodgeslaan word, hoe meer word die vlamme van verdeeldheid gestook.

• Asof verkiesingsellende nie genoeg is nie, loop die spook van ’n nuwe kabinet ook in die huis van interne verdeeldheid en onderlinge karaktermoord.

• Namibië se selfoonverskaffers en Telecom maak die afgelope tyd ’n verlies, want weens die kultuur van agterdog en politieke sluipmoord kan selfs ’n welwillendheidsoproep loopbane kelder of tot nuwe komplotte aanleiding gee.

• Dit is nie net tipies nie, maar is die bewys van die onrehabiliteerbare komplotpolitiek van Swapo se interne huismolesleierskap waaraan die party by die berugte 2004-skeuringskongres verslaaf geraak het.

• Faksie-magsdronkolisme! In die proses om die vure van eie- en faksiebelang te blus, tree van die party se veronderstelde leiers op soos ’n brandweerman wat ’n veldbrand blus met ’n goiingsak wat met petrol natgemaak is.

• Het Swapo al probeer om ’n faksielys saam te stel? Swapo-D, Swapo-CoD, Swapo-RDP, Swapo-exile, Swapo-binnelands, Swapo diplomatic, Swapomilitary, Swapo-Lubango, Swapo-Omusati, Swapo-Oukwanyama, Swapo-Ondonga, Swapo- Utoni, Swapo-Ekandjo, Swapo-Kwangarra, Swapo-Ngurare-jeugliga, Swapo-Hardap-jeugliga, Swapo-Dax en die tradisionele Daxerige-Swapo. Swapo-werkloos, Swapo-straathoek, Swapo R5- kamp, Swapo-Mix, Swapo-China, Swapo-Nujoma en Swapo-Pohamba, Vyf-voor-twaalf-Swapo, Boere-Swapo en Boervloek-Swapo?

• En dan het die party boonop net 54 setels in die NV om sy 154 faksies aan te spreek.

• Politieke klaasfaksies-leierskap. As dit so aangaan, sal elke lid van die party in 2012 na die volgende kongres sy eie Swapo hê waarvan hulle president kan wees.

• As die ECN nou nie eens weet hoeveel stemme in die land is nie, sal hulle nie die faksies van die 2012 historiese skeuringskongres kan tel nie.

• Namibiërs boer nie in die hof oor verkiesings- uitslae nie. Hulle boer in die hof oor faksies van Swapo wat dit nie aanvaar nie en die ECN wat dit nie kan regkry of voorgee dat hulle probeer nie.

Voorbarige Swapofaksie
 
Die voorbarige Swapofaksie wat optree asof die verkiesingshofsaak teen die party aanhangig gemaak is, moet Namibiërs vertel hoekom hulle oral aanmeld waar dit nie nodig is nie.

• Die domste Namibiër, Kerneels, met sy basiese Bantoe-onderwys, kan ’n paar afleidings maak oor Swapo se voorbokfaksie wat optree asof die verkiesingsaak oor Swapo gaan.

• Waarvoor keer die party se voorbarige faksie dat ’n hof die argumente van die opposisie moet aanhoor. Die ECN moet verduidelik, maar Swapo verduidelik baie meer.

• Is daar dinge wat selfs die ECN nie van Swapo weet nie waaroor gekeer moet word?

• Die tipe verskynsel waar die oortreders die owerheid help tot hulle self uiteindelik vir die oortredings aangekeer word, is ouer as tyd.

• Die polisie sal kan bevestig dat hulle die bron wat met die ondersoek na ’n reeksmoordenaar behulpsaam is, eerste ondersoek. Swapo tree nou op soos ’n gewoonte-oortreder, terwyl die hofsaak oor die reëlings van die ECN handel en nie oor Swapo se deelname aan die verkiesings nie.

• Wat is die probleem? As Swapo-leiers van die verskillende faksies nie ingelig is nie, moet hulle maar vir Paulus Kapia vra om te verduidelik hoe die prosedures van verdagte verkiesingsuitslae werk.

• Hy was in die vorige en huidige verkiesings aan die spits van organisasie en Kerneels kan nie dink hoekom ’n bedrogverdagte soos ’n impakspeler kort voor die verkiesings deur Swapo op die veld gebring word nie.

• Seker nie om hom minister van finansies te maak nie?

Kabinet-kraaines
 
Die kabinetspeletjies wat onderling aan die gang is, het reeds meer aspirante gediskwalifiseer as wat daar sitplek in die Nasionale Vergadering beskikbaar is.

• Soos huidige Swapo-ministers beswadder is weens ’n beweerde RDP-komplot en simpatie, is dit moontlik dat die opposisie dalk ’n meerderheid in die Pohamba-kabinet kan hê.

• Die probleem is dat mnr. Pohamba se pak kaarte nie soos in die 2004-verkiesings uit 55 bestaan nie, maar slegs 54 nadat een minder “joker” verkies is.

• ’n Groter probleem is dat die Minister van Toerisme, me. Nandi Netumbo-Ndaitwah, wat ’n slagoffer was van die kieskollege se koukuspolitiek weens haar beweerde “imperialistiese neigings” weens onvoorsiene omstandighede en die dood van ’n parlementskandidaat, inderdaad in die parlement gaan wees.

• Wat nou? Gaan sy in beseringstyd in die NV wees en haar werk verloor nadat die NWR onder meer spog oor hoe hulle die afgelope tyd en binne ’n ekonomiese insinking nuwe finansiële hoogtepunte gehad het.

• Me. Netumbo-Ndaitwah wat uitgegooi moes gewees het volgens die komplotpolitiek, moet nou eintlik bevorder word weens die sukses van Toerisme en Natuurbewaring.

• Kerneels glo mnr. Tobi Aupindi van die NWR het vir haar al ’n bos blomme gestuur vir haar bydrae om van die NWR so ’n dawerende sukses te maak.

• Mnr. Kazenambo wat sy vinger onder haar neus geswaai het in die NV en self ’n kortstondige mislukte loopbaan in die bedryf gehad het en nou sy Minister, mnr. Jerry Ekandjo, uitskel vir ’n stamdronk-diskrimineerder, het ook seker al verskoning gevra en me. Netumbo-Ndaitwah gelukgewens.

• Kerneels is bevrees dat dit nie die styl is waaraan Namibiërs gewoond is nie.

• Soos hy die party en die leierskap egter leer ken het, sal mnre. Kapia en Kazenambo bevorder word en me. Netumbo-Ndaitwah uitgewerk word.

• Is mos so, of hoe?

Vreemdeling-kabinet
 
Ministers en hul lakeie op verskeie fronte het mekaar so beswadder dat mnr. Pohamba dalk buite die landsgrense sal moet soek vir ministers.

• Iemand moet in elk geval die onwettige immigrante ook in Namibië in die hoogste gesag verteenwoordig.

• Chinees en Angolees of beide? ’n Chinese minister kan sommer die Ministerie van Werke en “Home Affairs” gesamentlik bestuur om geld te bespaar.

• As die skadukabinetspeletjies wat die politieke kansvatters en rylopers die afgelope weke en dae speel aanhou om gespeel te word, sal die Staatshoof, mnr. Hifikepunye Pohamba, nie anders kan as om onder die permanentes, onwettiges en Angolese vir nuwe bloed en nuwe Swapo’s te soek nie.

• Die boere byt nie en mnr. Kazenambo is moeg om elke keer ’n leier uit die noordelike Owambostreke te hê.

• Volgens die noordelike stemsyfers kan die trekkers en bestaansboere van Suid-Angola en semi-permanente inwoners van Windhoek-Noord uit Luanda op parlementêre verteenwoordiging aandring.

• Dan kan hulle minstens by wees as hulle bespreek word en wette vir Namibiërs gemaak word waarvoor hulle amnestie kry.

• Dit is mos die probleem van faksiepolitiek in Swapo se leierskorps.

• Een groep het amnestie en die ander het amnesia. Die probleem vir van die leiers is dat Namibiërs stadig maar seker uit die onafhanklikheidsnarkose begin wakker word.

• Dan sal Swapo nie net vir die stembus skrik soos nou die geval is nie, maar wakkerskrik en agterkom hulle is soos hul rolmodel, die destydse Nasionale Party van Suid-Afrika en later NP/ SWA sonder ’n naam en sonder ’n setel.

• Takamiesa tate!