Die Desemberseisoen in Maart? Dis hoe die swemplek in die Mole Sondag gelyk het toe ’n hittegolf Swakopmunders see toe gejaag het. Die strand en swemplek in die Mole het gewemel van mense en kinders het in hul poel by die grasperk baljaar. Volgens die amptelike weerkykers het die kwik maar gesukkel om 30 grade Celsius te haal, maar kuswoners sê dit was baie meer. Motorryers uit die binneland het beweer temperature het in die woestyn naby Swakopmund tot meer as 40 grade C gestyg. Dit is Maart, maar die buitengewone hitte is vergelyk met toestande wat normaalweg in Februarie langs die kus heers. Binnelanders het dit met oosweertoestande verwar, maar dit was net versengende somertoestande met min wind. Die toestande langs die kus het ook met ’n hittegolf in die Wes-Kaapland saamgeval.
