Multimiljoendollar kompleks vir Oshikango

DIE Oshikango-gedeelte van die Helao Nafidi-dorp in die Ohangwena-streek het weereens bewys dat dit ’n gesogte ligging is vir plaaslike en buitelandse beleggers, toe nog ’n multimiljoen handelskompleks Maandag amptelik ingewy is.

Die dorp se burgemeester, mnr. Peter Carolissen, wat die opening van die Namibia and China (Namchi) Park Shopping Centre gedoen het, het gesê die dorpsraad het aansporings vir alle soorte besighede geskep wat die grensdorp ’n beleggersnes gemaak het.

Volgens hom het die dorpsraad van Helao Nafidi die afgelope tyd bouplanne ter waarde van meer as N$100 miljoen goedgekeur.

“Hierdeur word werksgeleenthede vir plaaslike mense geskep,” het hy gesê. Hy het egter gesê dat die ekonomiese groei nie net gepaard gaan met die opheffing van die inwoners se lewenspeil nie, maar ook met maatskaplike uitdagings soos toenemende misdaad en siektes.

“Dit ruk ook die dorpsraad se kapasiteit om diens te lewer weens die instroming van mense vanaf die platteland,” het hy gese. Hy het die direkteurs van die Namchi Park vir die gepaste besluit om in Helao Nafidi te belê, geprys.