Direksies van twee groot rolspelers gekies

DRINGENDE projekte wat eers afgehandel moet word, het veroorsaak dat die direksie van NamWater vir die volgende vyf maande onveranderd gaan bly. Die Minister van Landbou, Water en Bosbou, mnr. John Mutorwa, het die aankondiging gemaak toe hy die nuwe direksies van NamWater en Meatco aangewys het.

Die Minister het gesê hy het hom op die wet beroep wat die aanstelling van NamWater se direksie voorskryf om te verseker dat die raad voorlopig eers onveranderd gelaat sal word.

“NamWater se raad van direkteure is in die proses om die instansie se prestasiekontrak met die Ministerie af te handel. Die proses is reeds baie naby aan klaar en ’n onderbreking in die werksvloei van die direksie sal nie in die stadium raadsaam wees nie.”

Mnr. Mutorwa het gesê die NamWater-raad is ook ver gevorder met kritieke punte in die voorsiening van water aan veral die nuwe mynprojekte in die woestyn. Die raad het ingestem om die projekte tot by die finale afhandeling deur te sien en volgens mnr. Mutorwa gaan die direksie tot aan die einde van Januarie aanstaande jaar in hul posisies dien.

In die opsig sal me. Wilhencia /Uiras steeds as die voorsitter en mnre. Markus von Jeney, Moses Shakela, Abraham Nehemia en Clement Daniels as lede dien. Die raad van Meatco word volgens ’n ander wet aangewys, maar dit het ook vir die volgende dienstydperk van drie jaar onveranderd gebly.

Mee. Sophy Kasheeta, Paulina Gomusab, mnre. Ripanda Meroro, Martin Hilbert, me. Clara Bohitile en mnr. Arne Gressmann is tot raadslede verkies en in die teenwoordigheid van die Minister moes die pas verkose direksielede ’n nuwe voorsitter kies.

Na ’n koukussessie van sowat tien minute het die nuwe direksielede me. Clara Bohitile aangewys om vir die volgende drie jaar as voorsitter te dien. Mnr. Mutorwa het uitgewys dat die nuwe direksies steeds ’n mate van deurlopendheid geniet en die vertroue uitgespreek dat die persone hulle goed van hul taak sal kwyt.

“Dit het al in die verlede gebeur dat sekere lede wat uit die geledere van sekere organisasies tot direksielede verkies is, net op een enkele aspek gekonsentreer het. Ek wil die nuwe direksielede aanraai om eers na die groter prentjie te kyk en om vraagstukke met regverdigheid te benader.”

Die Minister het voorts daarop gewys dat hy meen die regte persone is in die regte posisies aangewys en dat hy met trots aan die Kabinet verslag kan doen oor die twee maatskappye onder die beheer van die Ministerie van Landbou, Water en Bosbou.