Bank Windhoek open sy deure in Oshikango

BANK Windhoek het sy vlerke verder gesprei met ’n volwaardige tak wat verlede week op Oshikango in die Ohangwena-streek amptelik geopen is.

“Die opening van die tak op Oshikango is nog ’n mylpaal vir Namibië en vir Bank Windhoek,” het Bank Windhoek se besturende direkteur, mnr. James Hill, gesê. Hy het die bestuur en die personeel versoek om voort te gaan met die implementering van Bank Windhoek se leuse “Together we do better”.

Volgens hom het Bank Windhoek die afgelope 28 jaar sy netwerk van meer as 50 takke en agentskappe regoor Namibië gevestig met die doel om bekostigbare en toeganklike bankwese, nie net in Namibië se ekonomiese sentrums nie, maar ook in die platteland te voorsien.

Hy het Oshikango as ’n belangrike deurgang van goedere na die Angolese mark bestempel.

“Bank Windhoek se tak op Oshikango sal buitelandse valuta asook ’n wye spektrum van produkte voorsien wat die verskillende behoeftes van ons kliënte sal bevredig,” het hy gesê.

Streekgoewerneur Usko Nghaamwa het die opening van die tak verwelkom en die hoop uitgespreek dat dit die plaaslike ekonomie verder sal stimuleer.

Die tak wat in ’n handelkompleks in die hoofstraat geleë is, word deur sewe ervare en goed opgeleide bankamptenare beman.