Plaaslike Nissanhandelaars presteer in Suid-Afrika

PUPKEWITZ Nissan in Windhoek en Walvisbaai sowel as Southern Motor Mecca op Mariental het Namibië trots gemaak toe hulle uitsonderlik in Suid-Afrika presteer het tydens die Nissan Suid-Afrika (NSA) handelaarstoekennings in Johannesburg.

Pupkewitz Nissan Windhoek is by die prestige geleentheid bekroon as beste handelaar in die kategorie vir groot handelaars, tweede algeheel onder 123 handelaars asook die beste verkoopsprestasie vir nuwe voertuie in hul kategorie.

Die Walvisbaai-tak van Pupkewitz Nissan se diensbestuurder, mnr. Fanie du Toit, het erkenning gekry vir buitengewone diens en toewyding en is beloon met ’n spesiale toekenning. Southern Motor Mecca, die amptelike Nissan-handelaar op Mariental wat die suide van Namibië bedien, is ook vir sy verkoopsprestasies beloon.

Die verkoopsbestuurder van die handelaarskap, mnr. Ryan van Wyk, is vir die derde keer die afgelope paar jaar as beste verkoopsbestuurder in sy kategorie aangewys.